Prajakta Patil : सोलापूर जिल्ह्यातील माढा तालुक्यातील अनगर नगरपंचायतची बिनविरोध झालेली निवडणुकीची मोठी चर्चा संबंध राज्यात होत आहे. येत्या काही दिवसांवर नगरपरिषदा आणि नगरपंचायतींसाठी निवडणुका होणार आहेत. निवडणुका होण्याअगोदरच अनगर नगरपंचायत निवडणूक बिनविरोध झाली आहे. भाजपचे १७ उमेदवार बिनविरोध निवडून आल्यानंतर या नगरपंचायत निवडणुकीत नाट्यमयरित्या घडामोडी घडल्या. नगराध्यक्ष पदाच्या निवडणुकीत प्राजक्ता पाटील बिनविरोध निवडून आल्या आहेत. त्यांची बिनविरोध निवड झाल्यानंतर मोठ्या प्रमाणावर जल्लोष करण्यात आला. अनगर नगरपंचायत नगराध्यक्ष पदाच्या निवडणुकीत बिनविरोध विजयी झाल्यानंतर नवीन नगराध्यक्षा प्राजक्ता पाटील यांनी पहिली प्रतिक्रिया दिली आहे. मी उज्ज्वला थिटे यांचं अनगर गावात स्वागत करेन. उज्ज्वला थिटे कधीपण गावात येऊ द्या, त्यांना अनगर गावातून कोणी जायला सांगितलं नाही, त्या मनाने गेल्या आहेत, अशी प्रतिक्रिया अनगर नगरपंचायतीच्या नवीन नगराध्यक्ष प्राजक्ता पाटील यांनी एका वृत्तवाहिनीसोबत बोलताना दिली. या नगरपंचायतीसाठी आमदार राजन पाटील यांना आव्हान देत उज्ज्वला थिटे यांनी राष्ट्रवादी काँग्रेस (अजित पवार) यांच्या पक्षाकडून नगराध्यक्ष पदासाठी उमेदवारी अर्ज दाखल केला होता. पण या अर्जावर सूचकाची सही नसल्याने निवडणूक अधिकारी यांनी त्यांचा उमेदवारी अर्ज बाद केला. यानंतर राजन पाटील यांच्या सुनबाई प्राजक्ता पाटील या बिनविरोध विजयी झाल्या. निवडणुकीअगोदर नाट्यमय घडामोडी अनगर नगरपंचायतीच्या नगराध्यक्ष पदाच्या निवडणुकीसाठी एकूण तीन अर्ज भरण्यात आले होते. माजी आमदार राजन पाटील यांच्या धाकट्या सूनबाई प्राजक्ता पाटील यांनी भाजपकडून तर अपक्ष उमेदवार सरस्वती शिंदे आणि राष्ट्रवादी अजित पवार पक्षाकडून उज्ज्वला थिटे यांनी नगराध्यक्ष पदासाठी उमेदवारी अर्ज दाखल केले होते. छाननीनंतर उज्ज्वला थिटे यांचा अर्ज बाद ठरवण्यात आला. तर शिंदेंनी अर्ज मागे घेतला. या निवडणुकीअगोदर घडलेल्या नाट्यमय घडामोडींनी अनगर नगरपंचायतींची निवडणुकीची मोठी चर्चा सर्वत्र झाली. हेही वाचा : Kriti Sanon: ‘त्या व्यक्तीला वाढदिवसाच्या शुभेच्छा, ज्याच्या समोर मी अगदी निश्चिंत होऊ शकते…’ रूमर्ड बॉयफ्रेंड कबीर बहियाच्या वाढदिवशी कृति सेननची खास पोस्ट
