Case of poisonous alcohol : पुणे आणि पिंपरी-चिंचवड परिसराला हादरवून सोडणाऱ्या विषारी दारू प्रकरणात मृतांचा आकडा आता १८ वर पोहोचला आहे. अवघ्या दोन दिवसांत फुगेवाडी-दापोडी परिसरात १२ तर हडपसरमध्ये ६ जणांचा मृत्यू झाला असून अनेकांवर उपचार सुरू आहेत. फुगेवाडीतील सहा जणांची प्रकृती गंभीर असल्याने चिंतेचे वातावरण आहे. या घटनेमुळे १८ जणांच्या कुटुंबांवर दुःखाचा डोंगर कोसळला आहे.

गेल्या दोन दिवसांपासून या प्रकरणाची राज्यभरात चर्चा असून, आता या प्रकरणाच्या तपासात धक्कादायक माहिती समोर आली आहे. अधिक नफा कमावण्यासाठी आरोपी योगेश वानखेडे याने दारूमध्ये मिथेनॉल हे घातक रसायन मिसळत असल्याचे पोलिस तपासात उघड झाले आहे.

कोण आहे योगेश वानखेडे? 

योगेश वानखेडे हा एक व्यावसायिक दारू तस्कर आणि अवैध विक्रेता आहे. या प्रकरणात पहिली अटक त्याची झाली होती. त्यानंतर इतर आरोपींना पोलिसांनी बेड्या ठोकल्या. त्याच्या विरोधात दारू तस्करीशी संबंधित तीन गुन्हे वेगवेगळ्या पोलीस ठाण्यांमध्ये आधीच दाखल करण्यात आले आहेत. पोलीस सध्या या प्रकरणाच्या साखळीचा तपास करत असून, या प्रकरणात आणखी अटक होण्याची शक्यता आहे.

अधिक नफ्याचा हव्यास 

उरळी कांचन येथील देशी दारूची भट्टी चालवणारा राधेश्याम प्रजापती याच्याकडून योगेश वानखेडे ३५ लिटरचा एक कॅन १,९०० रुपयांना खरेदी करत होता. त्यानंतर ही दारू पुणे आणि पिंपरी-चिंचवडमधील विविध दारू गुत्त्यांवर २,७०० रुपयांना विकली जात होती. मात्र, दारूचे प्रमाण वाढवून अधिक नफा मिळवण्यासाठी ऑनलाईन मागवलेले मिथेनॉल त्यात मिसळले जात होते. या घातक मिश्रणामुळे अनेक निष्पाप नागरिकांचा जीव गेला असल्याचे प्राथमिक तपासात स्पष्ट झाले आहे.

दरम्यान, या प्रकरणाचा तपास आता गुन्हे अन्वेषण विभागाकडे वर्ग करण्यात आला आहे. पोलीस आयुक्त अमितेश कुमार यांनीही कठोर पावले उचलत हडपसर पोलीस ठाण्याचे प्रभारी अधिकारी मोगले, एपीआय सिकलगर आणि पोलीस उपनिरीक्षक मुलानी यांना निलंबित केले आहे.

या प्रकरणात आतापर्यंत आठ आरोपींना अटक करण्यात आली असून त्यापैकी चार जणांना ८ जूनपर्यंत पोलीस कोठडी सुनावण्यात आली आहे. तपास यंत्रणा संपूर्ण पुरवठा साखळीचा शोध घेत असून आणखी काही आरोपींचा सहभाग असल्याची शक्यता व्यक्त केली जात आहे.

हेही वाचा : Malaika Arora: साडीतला मलायका अरोराचा एलिगंट अंदाज व्हायरल; चाहत्यांकडून कौतुकाचा वर्षाव

मुख्यमंत्र्यांचे कडक कारवाईचे आदेश

या घटनेवर मुख्यमंत्री देवेंद्र फडणवीस यांनी पोलिसांना कडक कारवाईचे आदेश दिले आहेत. “ही अत्यंत गंभीर घटना असून विषारी दारू तयार करणाऱ्या आणि त्यामागील संपूर्ण रॅकेटचा शोध घेतला जात आहे. आतापर्यंत आठ जणांना अटक करण्यात आली असून आणखी काही जणांवर कारवाई होऊ शकते. ही केवळ निष्काळजीपणा नाही, तर एक प्रकारची हत्या आहे. दोषींवर कठोरात कठोर कारवाई केली जाईल,” असा इशारा मुख्यमंत्र्यांना दिला आहे.

रोहित पवार म्हणाले…

या विषारी दारू प्रकरणावर शरद पवार गटाचे आमदार रोहित पवार यांनी यांनी तीव्र संताप व्यक्त केला. त्यांनी हडपसरमधील कथित बेकायदा दारू अड्ड्याला भेट देत पक्ष कार्यकर्त्यांसह तेथील ठिकाणी तोडफोड केली आणि प्रशासनावर गंभीर आरोप केले. सरकार आणि पोलीस प्रशासन बेकायदा धंदे रोखण्यात पूर्णपणे अपयशी ठरले आहेत, अशी संतप्त प्रतिक्रिया रोहित पवारांनी दिली. या संपूर्ण प्रकरणामागे मोठं रॅकेट असल्याचा दावा रोहित पवारांनी केला आहे.

हेही वाचा : Weather update : पुढचे 24 तास महत्वाचे! हवामान विभागाकडून ‘या’ जिल्ह्यांना अलर्ट जारी