Bhimashankar Temple – बारा ज्योतिर्लिंगांपैकी एक असलेल्या श्रीक्षेत्र भीमाशंकर मंदिराचे दरवाजे तब्बल पाच महिन्यांनंतर सोमवार, दि. १५ रोजी भाविकांसाठी खुले करण्यात आले. पहिल्याच दिवशी ऑनलाईन नोंदणी केलेल्या एक हजार भाविकांनी पवित्र शिवलिंगाचे दर्शन घेतले. मात्र, ऑनलाईन नोंदणी नसल्याने सुमारे ७०० ते ८०० भाविकांना तसेच अनेक राजकीय पदाधिकारी, लोकप्रतिनिधी आणि शासकीय अधिकाऱ्यांना माघारी परतावे लागले.

सिंहस्थ कुंभमेळ्याच्या पार्श्वभूमीवर भीमाशंकर येथे मुख्य प्रवेशद्वार, सभामंडप, पायरीमार्ग आणि इतर विकासकामे सुरू असल्याने मंदिर ९ जानेवारीपासून दर्शनासाठी बंद होते. विकासकामे अंतिम टप्प्यात पोहोचल्यानंतर मंदिर मर्यादित स्वरूपात खुले करण्यात आले आहे. सकाळी पाच वाजता मंदिर उघडण्यात आले. आरतीनंतर सकाळी सात ते अकरा या वेळेत भाविकांना दर्शन देण्यात आले. पोलिसांनी दोन व चार क्रमांकाच्या वाहनतळांवरून ऑनलाईन नोंदणी केलेल्या भाविकांची पडताळणी करून प्रवेश दिला.

मात्र, वाहनतळापासून मंदिरापर्यंत सुमारे एक ते दीड किलोमीटर अंतर पायी जावे लागत असल्याने भाविकांनी वाहतूक सुविधेची मागणी केली. दरम्यान, व्हीआयपी व्यक्तींनाही ऑनलाईन नोंदणी सक्तीची असल्याने काही ठिकाणी देवस्थान पदाधिकारी आणि संबंधितांमध्ये शाब्दिक वाद झाल्याचे समजते. देवस्थान ट्रस्ट, पोलीस प्रशासन आणि स्वयंसेवकांनी समन्वयाने काम करत आहे. २६ जूनपर्यंतची नोंदणी पूर्ण झाली असून भाविकांनी पूर्वनोंदणी करूनच दर्शनासाठी यावे, असे आवाहन करण्यात आले आहे.

“दर्शनासाठी सर्वांसाठी एकच नियम लागू आहे. व्हीआयपी, लोकप्रतिनिधी, अधिकारी किंवा सामान्य भाविक असा कोणताही भेदभाव केला जाणार नाही. ऑनलाईन नोंदणी केल्यानंतरच दर्शनासाठी प्रवेश दिला जाईल.”
– सुरेश कौदरे, अध्यक्ष, देवस्थान ट्रस्ट.

“मंदिर परिसरात सुरक्षा आणि गर्दी नियंत्रणासाठी विशेष बंदोबस्त तैनात करण्यात आला आहे. भाविकांनी प्रशासनाच्या सूचनांचे पालन करावे. नोंदणी नसलेल्या व्यक्तींनी गर्दी टाळून सहकार्य करावे.”
– सागर पवार, सहाय्यक पोलीस निरीक्षक, घोडेगाव पोलीस ठाणे.