Zeeshan Siddique : नीट पेपरफुटीच्या मुद्द्यावरून झालेल्या आंदोलनात सहभागी झालेल्या विद्यार्थ्यांवरील गुन्हे (एफआयआर) मागे घेण्यात यावेत, अशी विनंती सत्ताधारी महायुतीचे आमदार झिशान सिद्दीकी (Zeeshan Siddique) यांनी शनिवारी मुख्यमंत्री देवेंद्र फडणवीस यांना केली. फौजदारी कारवाईचा त्यांच्या शैक्षणिक आणि व्यावसायिक भविष्यावर परिणाम होऊ नये, असे त्यांनी म्हटले आहे.

सिद्दीकी (Zeeshan Siddique) यांनी फडणवीस यांना लिहिलेल्या पत्राची प्रत एक्स समाज माध्यमावर पोस्ट केली. त्यांनी म्हटले की, या विद्यार्थ्यांनी उपस्थित केलेल्या समस्यांचे आता निवारण झाले आहे, त्यामुळे त्यांच्यावर दाखल केलेले गुन्हे मागे घेण्याचा कृपया विचार करावा.

हे तरुण विद्यार्थी आहेत आणि त्यांच्या आयुष्याची ही सुरुवात आहे, अशा वेळी फौजदारी कारवाईचे ओझे त्यांच्या शैक्षणिक आणि व्यावसायिक भविष्यावर सावली पाडणारे ठरू नये, असे सिद्दीकी यांनी पत्रात म्हटले आहे.

दिल्लीतील जंतर-मंतर येथे सुरू असलेल्या आंदोलनाच्या समर्थनार्थ गेल्या काही दिवसांत मुंबई, पुणे आणि महाराष्ट्राच्या इतर भागांत झालेल्या निदर्शनांचा उल्लेख करत, त्यांनी सांगितले की आंदोलनादरम्यान (Zeeshan Siddique) अनेक विद्यार्थ्यांना पोलिसांच्या नोटिसाही मिळाल्या होत्या. हे खटले बंद करण्याचा सहानुभूतीपूर्ण निर्णय घेतल्यास तो लोकशाही, निष्पक्षता आणि सामंजस्याचे एक उत्तम उदाहरण ठरेल, असे सिद्दीकी यांनी ठामपणे सांगितले.

अशा निर्णयामुळे हा विश्वास दृढ होईल की, कायद्याचा आदर करणे आवश्यक असले तरी, ज्या तरुण नागरिकांनी शांततापूर्ण मार्गाने आपल्या समस्या मांडल्या, त्यांना फौजदारी खटल्यांच्या दीर्घकालीन परिणामांना सामोरे न जाता पुढे जाण्याची संधी मिळायला हवी, असे ते म्हणाले. त्यांनी मुख्यमंत्र्यांना आपल्या विनंतीचा सकारात्मक विचार करण्याची विनंती केली.