Paris Paralympics 2024 (Men’s shot put F46 Final) : पॅरिस पॅरालिम्पिकच्या 7व्या दिवशी, भारताच्या सचिन खिलारीने पुरुषांच्या गोळाफेक एफ46 (Shot Put F46) प्रकारात रौप्य पदक जिंकले आहे. हे आजचे (बुधवार,4 सप्टेंबर) भारताचे पहिले पदक आहे. या रौप्य पदकासह, सचिन 40 वर्षांत पॅरालिम्पिक शॉट-पुट मध्ये पदक जिंकणारा पहिला भारतीय पुरुष खेळाडू ठरला आहे. यापूर्वी 1984 मध्ये भारताने पुरुषांच्या शॉटपुटमध्ये पहिले पदक जिंकले होते.

सचिनचे रौप्यपदक हे सध्याच्या पॅरालिम्पिकमधील भारताचे हे 21 वे पदक होते. भारताने आतापर्यंत 3 सुवर्ण, 7 रौप्य आणि 11 कांस्य पदके जिंकली आहेत.  सचिनने 16.32 मीटरच्या आशियाई विक्रमी थ्रोसह दुसरे स्थान पटकावले. कॅनडाच्या ग्रेग स्टीवर्ट पहिल्या स्थानावर राहिला. ग्रेग स्टीवर्टने 16.38 मीटरच्या थ्रोसह सुवर्णपदक जिंकले. क्रोएशियाच्या लुका बाकोविकने 16.27 मीटरच्या थ्रोसह कांस्यपदक जिंकले.

आशियाई विक्रम मोडून जिंकले पदक 

भारताच्या 34 वर्षीय सचिनने दुसऱ्या प्रयत्नात आपली सर्वोत्तम कामगिरी (16.32 मी.) केली आणि 16.30 मीटरचा स्वतःचा आशियाई विक्रम मोडला. मे 2024 मध्ये जपानमध्ये झालेल्या जागतिक पॅरा-ॲथलेटिक्स चॅम्पियनशिपमध्ये सुवर्णपदक जिंकून त्याने हा विक्रम केला होता. खिलारीचे रौप्यपदक हे सध्या सुरू असलेल्या पॅरा गेम्समध्ये पॅरा-ॲथलेटिक्समध्ये जिंकलेले 11 वे पदक आहे. गेल्या वर्षी चीनमध्ये झालेल्या आशियाई पॅरा गेम्समध्येही त्याने सुवर्णपदक पटकावले होते. F46 श्रेणी अशा खेळाडूंसाठी आहे ज्यांच्या हातात कमकुवतपणा आहे, स्नायू कमकुवत आहेत किंवा त्यांच्या हातात हालचाल कमी आहे. यामध्ये खेळाडू उभे राहून स्पर्धा करतात.

शॉटपुटमध्ये तिसरे पदक

पॅरालिम्पिकच्या इतिहासात शॉटपुटमध्ये पदक जिंकणारा सचिन खिलारी हा केवळ तिसरा भारतीय खेळाडू आहे. यापूर्वी 1984 मध्ये जोगिंदर सिंग बेदीने कांस्यपदक जिंकले होते तर महिला अॅथलीट दीपा मलिकने 2016 च्या रिओ पॅरालिम्पिकमध्ये कांस्यपदक जिंकले होते. आता हे तिसरे पदक 8 वर्षांनंतर आले आहे.

फायनलमध्ये सचिन खिलारीची कामगिरी…

पहिला थ्रो – 14.72 मीटर
दुसरा थ्रो- 16.32 मीटर*
तिसरा थ्रो- 16.15 मीटर
चौथा थ्रो- 16.31 मीटर
पाचवा थ्रो- 16.03 मीटर
सहावा थ्रो – 15.95 मीटर

Paris Paralympics 2024 : भालाफेक नंतर उंच उडीतही भारताचा दुहेरी धमाका, शरद-मरियप्पन यांनी जिंकली पदके…

पंतप्रधानांनी सचिन खिलारीचे केले अभिनंदन…

पंतप्रधान नरेंद्र मोदी यांनी पॅरीस पॅरालिम्पिक्स 2024 मध्ये पुरुषांच्या गोळाफेक एफ46 प्रकारात रौप्य पदक जिंकल्याबद्दल सचिन खिलारीचे अभिनंदन केले आहे. पंतप्रधान आपल्या एक्स (X) वरील संदेशात लिहले आहे की, “सचिन खिलारीने #Paralympics2024 मध्ये अतुलनीय यश मिळवल्याबद्दल त्याचे अभिनंदन! ताकद आणि निश्चयाचे लक्षणीय प्रदर्शन घडवत त्याने पुरुषांच्या गोळाफेक एफ46 प्रकारात रौप्य पदक जिंकले. भारताला त्याचा अभिमान आहे.”

कोण आहे सचिन….

मूळ सांगलीच्या असणारा सचिन गेल्या 4 वर्षांपासून पुण्यातील आझम स्पोर्ट्स अकादमीच्या मैदानावर सराव करत आहे. सरावात सातत्य राखणाऱ्या सचिनने सुरुवातीपासून दमदार खेळाच्या जोरावर अनेक स्पर्धांमध्ये यश मिळविले. बंगळूर येथील झालेल्या राष्ट्रीय स्पर्धेत सचिनने पहिल्यादा सुवर्णपदक पटकावले. त्यांनतर त्याने आपल्या कामगिरीत सातत्य राखताना आशियाई स्पर्धेसाठी निवड करण्यात आली. त्याने प्रथमच आशियाई पॅरा अॅथलेटिक स्पर्धेत खेळताना 16.03 मीटर गोळाफेक करताना सुवर्णपदकाची कमाई केली. त्यानंतर सुरु झालेला सचिनचा प्रवास पॅरा ऑलिम्पिक पर्यंत येवून ठेपला आहे.

Paris Paralympics 2024 : भालाफेकमध्ये भारताचा दुहेरी धमाका, ‘या’ 2 खेळाडूंनी मिळवली आणखी दोन पदके…

परिस्थितीशी झगडताना स्वत:तील ‘खेळाडूला’ ठेवले जिवंत..!!

सांगली जिल्ह्याच्या आटपाडी तालुक्यातील करगणी हे सचिनचे मूळ गाव. शालेय वयापासूनच प्रचंड बुद्धिमत्ता असून देखील सचिनने ‘खेळाला’ निवडले. अभियांत्रिकीचे शिक्षण पूर्ण केल्यानंतर राज्य सेवा परीक्षेची तयारी सुरु केली. सन 2015 साली सचिनने राज्य सेवा परीक्षेची मुख्य परीक्षेपर्यंत मजल मारली, मात्र त्यात त्याला अपयश आले. त्यानंतर त्याने याच परिक्षांसाठी आवश्यक असणारा भूगोल हा विषय शिकविण्यास सुरुवात केली. यामध्ये त्याने गुरुकुल अकादमी, गणेश कड अकादमी अशा ठिकाणी व्याख्याता म्हणून नोकरी देखील केली. हे सर्व सुरु असताना त्याने आपल्या खेळाचा सराव देखील एका बाजूला सुरुच ठेवला होता. साईचे प्रशिक्षक असणारे अरविंद चव्हाण यांच्याकडून त्याने खेळाचे धडे गिरवले आहेत.