Vijay Vadettiwar : मुस्लिमांविषयी सहानुभूती असेल तर काँग्रेस आता मुस्लिम व्यक्तीला पक्षाध्यक्ष का करत नाही? आणि लोकसभेसाठी ५० टक्के तिकिटं मुस्लिम उमेदवारांसाठी का राखून ठेवत नाही, असा सवाल करत पंतप्रधान नरेंद्र मोदी यांनी काँग्रेसवर हल्लाबोल केला होता. हरियाणातील हिसार विमानतळाच्या उद्घाटन समारंभात बोलताना पंतप्रधानांनी काँग्रेसवर निशाणा साधला होता. यावर आता काँग्रेस पक्षाचे नेते विजय वडेट्टीवार यांनी भाजपवर जोरदार पलटवार केला आहे.

काँग्रेस पक्षाचा अध्यक्ष मुस्लिम असेल का? या भाजपच्या प्रश्नावर काँग्रेसचे नेते आणि आमदार विजय वडेट्टीवार म्हणाले की, आमच्या प्रश्नाचा अध्यक्ष मुस्लिम असेल का? असा प्रश्न विचारला जात असेल तर मी देखील राष्ट्रीय स्वयंसेवक संघाचा किंवा भाजपचा मुस्लिम प्रमुख असेल का? असा प्रश्न विचारु शकतो. असे म्हणत वडेट्टीवार यांनी भाजपवर जोरदार पलटवार केला आहे.

काँग्रेस आमदार विजय वडेट्टीवार म्हणाले की, देश भाजपच्या राजकारणावर लक्ष ठेवून आहे. जर ते आम्हाला विचारत असतील की, काँग्रेसमध्ये मुस्लिम अध्यक्ष असेल का, तर मी त्यांना विचारू इच्छितो की, त्यांच्याकडे कधी राष्ट्रीय स्वयंसेवक संघाचा किंवा भाजपचा मुस्लिम प्रमुख असेल का? असं विजय वडेट्टीवार म्हणाले.

काय म्हणाले होते पंतप्रधान नरेंद्र मोदी ?

पंतप्रधान नरेंद्र मोदी म्हणाले की, मुस्लिमांविषयी सहानुभूती असेल तर काँग्रेस आता मुस्लिम व्यक्तीला पक्षाध्यक्ष का करत नाही? आणि लोकसभेसाठी ५० टक्के तिकिटं मुस्लिम उमेदवारांसाठी का राखून ठेवत नाही. काँग्रेसने नेहमीच मुस्लिम मूलतत्त्ववाद्यांचे लांगूलचालन केले आहे आणि नवीन कायद्याविरोधात असलेली त्यांची भूमिका हेच सिद्ध करते. बाबासाहेब आंबेडकर यांची जयंती ही प्रेरणा आहे. माझ्या सरकारचे प्रत्येक निर्णय आणि धोरण हे बाबासाहेबांना समर्पित आहे. असं काँग्रेसवर टीका करताना त्यांनी म्हटले.