Crime News : कर्नाटकातील विजयपूर जिल्ह्यात शुक्रवारी सायंकाळी घडलेल्या सामूहिक हत्याकांडाने संपूर्ण परिसर हादरून गेला आहे. चडचाण तालुक्यातील गोविंदपूर गावात अज्ञात हल्लेखोरांनी गोळीबार आणि धारदार शस्त्रांनी हल्ला करत सहा जणांची निर्घृण हत्या केली. या घटनेमुळे सीमाभागात भीतीचे वातावरण निर्माण झाले असून गावात तणावपूर्ण शांतता आहे. (Crime News)

प्राथमिक माहितीनुसार, गोविंदपूर गावातील निराळे आणि गुळगी (गोलगी) कुटुंबांमध्ये अनेक वर्षांपासून जमिनीच्या वादावरून संघर्ष सुरू होता. याच जुन्या वैमनस्यातून हा रक्तरंजित हल्ला झाल्याचा संशय पोलिसांकडून व्यक्त करण्यात येत आहे. (Crime News)

हल्लेखोरांनी गावात येत थेट गोळीबार सुरू केला. त्यानंतर काहींवर धारदार शस्त्रांनी वार करण्यात आले. या भीषण हल्ल्यात सहा जणांचा जागीच मृत्यू झाला. मृतांमध्ये रेवणसिद्धप्पा निराळे, दुंडप्पा रेवणसिद्धप्पा निराळे, शिवपुत्र रेवणसिद्धप्पा निराळे, चंद्रशेखर निराळे आणि शब्बीर अत्तार यांचा समावेश असल्याची माहिती समोर आली आहे. आणखी एका मृत व्यक्तीची ओळख अद्याप स्पष्ट झालेली नाही. (Crime News)

घटनेची माहिती मिळताच पोलिसांचा मोठा बंदोबस्त गावात तैनात करण्यात आला. वरिष्ठ पोलीस अधिकारी घटनास्थळी दाखल झाले असून हल्लेखोरांचा शोध घेण्यासाठी विशेष पथके तयार करण्यात आली आहेत. संपूर्ण परिसरात कडेकोट सुरक्षा व्यवस्था करण्यात आली आहे. (Crime News)

या सामूहिक हत्याकांडामुळे विजयपूर जिल्ह्यासह भिमातीर परिसरात मोठी खळबळ उडाली असून, जमिनीच्या वादातून पुन्हा एकदा रक्तपात झाल्याची चर्चा सुरू आहे. पोलिसांकडून सखोल तपास सुरू असून हल्ल्यामागील नेमके कारण आणि आरोपींचा शोध घेण्याचे प्रयत्न सुरू आहेत. (Crime News)