Double Murder Case – निगडोली गावात ७५ वर्षीय वृद्ध दाम्पत्याची घरात गळा कापून निर्घृण हत्या करण्यात आल्याची धक्कादायक घटना मंगळवारी उघडकीस आली. या दुहेरी हत्येमुळे संपूर्ण तालुक्यात खळबळ उडाली असून नातेवाईकांच्या आक्रोशाने परिसरात हळहळ व्यक्त होत आहे. पोलिसांनी घटनास्थळी धाव घेत विविध तपास यंत्रणांच्या मदतीने कसून तपास सुरू केला आहे.

मिळालेल्या माहितीनुसार, बँकेतून सेवानिवृत्त झालेले रघुनाथ फराट (वय ७५) आणि त्यांची पत्नी सुरेखा फराट (वय ७२) हे निगडोली गावात दोघेच राहत होते. मंगळवारी दिवसभर रघुनाथ फराट यांना मुलाने मोबाईलवर संपर्क करण्याचा प्रयत्न केला, मात्र प्रतिसाद मिळत नसल्याने संशय निर्माण झाला. त्यानंतर नातू आदित्य फराट हा गावातील घरी आला. घराचा दरवाजा ठोठावूनही प्रतिसाद न मिळाल्याने त्याने मागील दरवाजातून घरात प्रवेश केला.

घरात प्रवेश करताच आजी-आजोबा रक्ताच्या थारोळ्यात पडलेले दिसल्याने त्याच्या पायाखालची जमीन सरकली. रघुनाथ फराट यांचा गळा चिरलेला होता, तर सुरेखा फराट यांच्या तोंडावर धारदार हत्याराने वार करण्यात आले होते. तसेच त्यांच्या अंगावर राख आणि पाला-पाचोळा टाकण्यात आल्याचेही आढळून आले. हा प्रकार पाहताच आदित्यने आरडाओरडा केल्याने गावकरी घटनास्थळी जमा झाले.

घटनेची माहिती मिळताच खालापूर पोलीस तात्काळ घटनास्थळी दाखल झाले. फॉरेन्सिक लॅबची टीम, डॉग स्कॉड तसेच अन्य तपास यंत्रणांनी रात्री उशिरापर्यंत तपास सुरू ठेवला. घटनास्थळी हल्लेखोराच्या पायातील एक बूट आढळून आला असून पोलिसांनी तो ताब्यात घेतला आहे. रात्री उशिरा जिल्हा पोलीस अधीक्षक आँचल दलाल तसेच अपर पोलीस अधीक्षक अभिजीत शिवतरे यांनी घटनास्थळी भेट देऊन तपासाचा आढावा घेतला.

मयत सुरेखा फराट या राष्ट्रवादी काँग्रेसचे जिल्हाध्यक्ष सुधाकर घारे यांच्या आत्या असल्याने घारे हे देखील रात्रभर घटनास्थळी उपस्थित होते. या प्रकरणी खालापूर पोलीस ठाण्यात गुन्हा दाखल करण्यात आला असून उपविभागीय पोलीस अधिकारी डॉ. विशाल नेहूल पाटील यांच्या मार्गदर्शनाखाली पोलीस निरीक्षक सचिन पवार तपास करीत आहे.