Anti-encroachment action: अतिक्रमण कारवाईचा आढावा; आयुक्तांकडून समन्वयाने काम करण्याच्या सूचना
Anti-encroachment action:

Anti-encroachment action: शहरातील अतिक्रमणांविरोधात महापालिकेने कारवाईचा धडाका सुरू केला असतानाच, महापालिका आयुक्त नवल किशोर राम यांनी अतिक्रमण निर्मूलन आणि शहरातील पायाभूत सुविधांच्या कामांचा आढावा घेतला.
सार्वजनिक रस्ते आणि पदपथ अडथळामुक्त ठेवण्याबरोबरच वाहतूक सुलभ करण्यासाठी संबंधित विभागांनी समन्वयाने काम करावे, अशा सूचना त्यांनी बैठकीत दिल्या.
आयुक्त राम यांच्या अध्यक्षतेखाली शनिवारी (दि. २१) ही बैठक झाली. या वेळी शहर अभियंता अनिरुद्ध पावसकर, पथ विभागाचे मुख्य अभियंता बनकर, प्रकल्प विभागाचे मुख्य अभियंता दिनकर गोजरे, भवन विभागाचे मुख्य अभियंता बिपीन शिंदे, उपायुक्त अविनाश सकपाळ, आशा राऊत, विजयकुमार थोरात, संदीप कदम, अरविंद माळी, प्रसाद काटकर यांच्यासह विविध विभागांचे अधिकारी उपस्थित होते.
बैठकीत शहरातील अतिक्रमणांची सद्यस्थिती आणि त्यावर करण्यात येणाऱ्या कारवाईचा आढावा घेण्यात आला. याशिवाय रस्ते, पदपथ, दुभाजक आणि शहर सुशोभीकरणाच्या कामांवर चर्चा झाली.
सार्वजनिक जागा नागरिकांसाठी अडथळामुक्त ठेवणे, वाहतुकीला अडथळा निर्माण होणार नाही, याची दक्षता घेणे आणि पायाभूत सुविधांची गुणवत्ता राखणे, यावर बैठकीत भर देण्यात आला. शहरातील अतिक्रमणांवर प्रभावी नियंत्रण ठेवण्यासाठी विभागांनी नियोजनबद्ध पद्धतीने आणि परस्पर समन्वयातून कार्यवाही करावी, असे बैठकीत स्पष्ट करण्यात आले.





