Ukraine-Russia war : रशियाने युक्रेनमध्ये केलेल्या माऱ्यात किमान दोन जण ठार झाले आहेत. तर युक्रेनच्या सैन्याने रशियाच्या नैऋत्येकडील एका ड्रोन उत्पादक फॅक्टरीवर मारा केला आहे. युक्रेनच्या उत्तरेकडील चेर्नोबिल भागात रशियाने रात्रीच्यावेळी केलेल्या मोठ्या ड्रोन हल्ल्यात १६ वर्षांचा एक मुलगा ठार झाला आणि अन्य चौघेजण जखमी झाले आहेत, असे या शहराच्या लष्करी प्रशासनाच्या प्रमुखांनी सांगितले. याठिकाणच्या इमारतीचे ढिगारे हटवल्यानंतर किशोरवयीन मुलाचा मृतदेह अधिकाऱ्यांना आढळून आला. ड्रोन हल्ल्यात तीन महिला आणि एक पुरुषही जखमी झाले. या ड्रोन हल्ल्यामुळे अनेक घरांना आग लागली होती. रविवारी सकाळी रशियाने दक्षिणेकडील खेरसॉन शहरावरही ड्रोन हल्ला केला. शहराच्या मध्यवस्तीत रस्त्याने जाणाऱ्या व्हॅनवर ड्रोन पडल्यामुळे वाहन चालक ठार झाला. स्फोटात जखमी झालेल्या दुसऱ्या एका व्यक्तीला रुग्णालयात दाखल करण्यात आले आहे, अशी माहिती प्रादेशिक अधिकाऱ्यांनी दिली. रशियाने एकूण २३६ ड्रोन डागली. त्यापैकी २०३ ड्रोन हवेतच पाडण्यात आली. तर ३२ ड्रोन १८ वेगवेगळ्या ठिकाणच्या आपल्या लक्ष्यावर आदळली, असे युक्रेनच्या हवाई दलाने सांगितले. दरम्यान युक्रेनने रशियाच्या तागान्रोग शहरातल्या ड्रोन फॅक्टरीवर मारा केला. ही फॅक्टरी पूर्व युक्रेनमधील रशियाच्या ताब्यात आहे. अटलांटा एरो फॅक्टरीला ड्रोन हल्ल्यामुळे आग लागली. या फॅक्टरीत ड्रोनचे डिजाईन, टेहळणी ड्रोन, ड्रोनचे सुटे भाग तसेच २५० किलोपर्यंत स्फोटके वाहून नेणाऱ्या अति शक्तिशाली ड्रोनचे महत्वाचे भाग तयार केले जात असतात. या ड्रोन हल्ल्यात किमान तिघेजण जखमी झाले. मात्र यामुळे फॅक्टरीचे किती नुकसान झाले, हे अधिकाऱ्यांनी स्पष्ट केले नाही. रशियाच्या सैन्याने रात्रीच्या वेळी युक्रेनची २७४ ड्रोन, तसेच गायडेड एरियल बॉम्ब आणि युक्रेनमध्ये बनवलेले एक नेपच्यून क्षेपणास्त्र पाडले, असे रशियाच्या संरक्षण मंत्रालयाने सांगितले.
