Sanjay Raut : शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांच्या दिल्ली दौऱ्यावरून राजकीय वाद पेटला आहे. ६ ते ८ ऑगस्ट २०२५ दरम्यान ठाकरे दिल्लीत होते. तिथे त्यांनी इंडिया आघाडीच्या बैठकीला हजेरी लावली आणि राहुल गांधी यांच्या निवासस्थानी सहकुटुंब भेट घेतली. मात्र, या बैठकीत उद्धव ठाकरे आणि आदित्य ठाकरे यांना मागे बसवल्याचा दावा सत्ताधारी शिंदे गट आणि भाजपने केला आहे. “उद्धव ठाकरे यांनी महाराष्ट्राची लाज घालवली” अशी जहरी टीका शिंदे गटाचे खासदार नरेश म्हस्के यांनी केली.

राहुल गांधी यांच्या निवासस्थानी ७ ऑगस्ट रोजी झालेल्या इंडिया आघाडीच्या बैठकीत निवडणुकीतील कथित घोटाळ्यांवर प्रेझेंटेशन देण्यात आले. यावेळी उद्धव ठाकरे, आदित्य ठाकरे आणि संजय राऊत उपस्थित होते. सत्ताधाऱ्यांनी ठाकरेंना मागे बसवल्याचा फोटो शेअर करत टीका केली.

संजय राऊतांचा पलटवार

संजय राऊत यांनी सणसणीत प्रत्युत्तर देत म्हटले, “आम्ही राहुल गांधींच्या घरी गेलो होतो. प्रेझेंटेशनसाठी स्क्रीन समोर बसून पाहण्यात त्रास होत होता, म्हणून आम्ही मागे बसलो. ती जागा बसण्याची नव्हती, प्रेझेंटेशन पाहण्यासाठी होती. भाजपच्या फालतू लोकांनी हे समजून घ्यावं. उद्धव ठाकरे टेक्निकल गोष्टींत तज्ञ आहेत, त्यांना स्क्रीन नीट दिसावी म्हणून ते मागे गेले.”

राऊत पुढे म्हणाले, “राहुल गांधी आणि त्यांचे कुटुंबीय ठाकरेंच्या कुटुंबाला भेटले. त्यांनी नवीन घर दाखवले. वोट चोरीविरोधातील प्रेझेंटेशन पाहण्यासाठी प्रमुख नेत्यांना पुढे बसवले होते, पण दृष्टीकोनात अडचण येत असल्याने आम्ही मागे बसलो. यात अपमान कुठे आहे?”

शिंदे गटाची टीका

शिंदे गटाचे खासदार नरेश म्हस्के यांनी उद्धव ठाकरेंवर जोरदार हल्ला चढवला. ते म्हणाले, “शिवरायांचा आणि बाळासाहेबांचा स्वाभिमान शिकवणारा वारसा उद्धव ठाकरेंनी विसरला का? काँग्रेसच्या बैठकीत शेवटच्या रांगेत बसून महाराष्ट्राची लाज घालवली. एक खासदार असलेल्या पक्षांना पुढे बसवले, मग ठाकरेंची ही अवस्था का? स्वाभिमान शिल्लक असेल तर पेटून उठा!”

नरेश म्हस्के दुतोंडी गांडूळ

संजय राऊत म्हणाले की, त्या म्हस्केंना सांगा, दुतोंडी गांडूळ, बाळासाहेब ठाकरे यांची शिवसेना फोडताना तुम्हाला मान-अपमान दिसले नाही का? दिल्लीत येऊन मोदी आणि शाह यांची चाटुगिरी करतात, तेव्हा तुम्हाला शिवरायांचा महाराष्ट्र दिसत नाही का? आमचे आम्ही बघून घेऊ. अविमुक्तेश्वरानंद नावाचे शंकराचार्य आहेत. जे एकनाथ शिंदे यांच्या निवासस्थानी जाऊन त्यांना आशीर्वाद देत असतात, असं संजय राऊत म्हणाले.