Tulapur Project X Party  – धर्मवीर छत्रपती संभाजी महाराज यांच्या बलिदानाने पावन झालेल्या तुळापूरच्या ऐतिहासिक भूमीत कथित रेव्ह पार्टी झाल्याची माहिती समोर आल्यानंतर ग्रामस्थांमध्ये तीव्र संतापाची भावना व्यक्त होत आहे. या प्रकाराचा निषेध करत स्थानिक नागरिकांनी प्रशासनाच्या भूमिकेवरही गंभीर प्रश्न उपस्थित केले आहेत. तुळापूर हे छत्रपती संभाजी महाराजांच्या बलिदानाशी संबंधित देशातील एक महत्त्वपूर्ण ऐतिहासिक आणि प्रेरणादायी स्थळ मानले जाते.

दरवर्षी हजारो शिवभक्त, इतिहासप्रेमी आणि पर्यटक येथे भेट देतात. अशा ऐतिहासिक आणि सांस्कृतिक वारसा लाभलेल्या ठिकाणी कथित रेव्ह पार्टीसारख्या प्रकारांची चर्चा समोर आल्यानंतर ग्रामस्थांनी तीव्र नाराजी व्यक्त केली आहे. गावात अशा प्रकारच्या कार्यक्रमाचे आयोजन होत असल्याची कोणतीही पूर्वकल्पना त्यांना नव्हती. संबंधित प्रकरणात पोलिसांनी कारवाई केल्यानंतरच हा प्रकार उघडकीस आल्याचे सांगितले जात आहे.

त्यामुळे गावाच्या प्रतिमेला धक्का पोहोचल्याची भावना स्थानिक नागरिकांनी व्यक्त केली. धर्मवीर छत्रपती संभाजी महाराजांची ही बलिदानभूमी आहे. अशा पवित्र स्थळी कथित रेव्ह पार्टी, मद्यपान किंवा अन्य गैरप्रकारांशी संबंधित घटना घडल्याच्या बातम्या समोर येणे अत्यंत दुर्दैवी आणि निषेधार्ह आहे, अशी प्रतिक्रिया काही ग्रामस्थांनी व्यक्त केली.

तसेच, तुळापूरच्या ऐतिहासिक महत्त्वाचा विचार करता अशा प्रकारच्या कार्यक्रमांसाठी परवानग्या देताना अधिक दक्षता घेणे आवश्यक होते का, याबाबतही प्रश्न उपस्थित केले जात आहेत. गावाच्या प्रतिष्ठेला बाधा पोहोचविणार्‍या घटनांविरोधात ग्रामसभेच्या माध्यमातून ठोस भूमिका घेण्याची आवश्यकता असल्याचे मतही व्यक्त करण्यात येत आहे.

कठोर धोरण आखण्याची गरज
स्थानिक नागरिकांनी प्रशासनाकडे परवानगी प्रक्रिया, आयोजकांची जबाबदारी, कार्यक्रमाचे स्वरूप आणि नियमांचे पालन याबाबत सखोल चौकशी करण्याची मागणी केली आहे. तसेच भविष्यात ऐतिहासिक आणि सांस्कृतिक दृष्ट्या संवेदनशील ठिकाणी अशा प्रकारच्या वादग्रस्त घटना घडू नयेत यासाठी कठोर धोरण आखण्याची गरज असल्याचे मत व्यक्त होत आहे.