Mahatma Gandhi Jayanti- महात्मा गांधी जयंतीनिमित्त पुणेकरांना चरख्याचा इतिहास, त्याची रचना आणि त्यामागील स्वावलंबनाची संकल्पना प्रत्यक्ष अनुभवण्याची अनोखी संधी मिळाली. छत्रपती संभाजी महाराज उद्यानासमोर, जंगली महाराज रस्त्यावर कोथरूड चरखा संघाच्या वतीने आयोजित अखंड चरखा सुतकताई उपक्रमात नागरिकांनी स्वतः चरखा चालविण्याचा अनुभव घेतला. विशेष म्हणजे येरवडा कारागृहात डिझाइन झालेला पेटी चरखा या वेळी आकर्षणाचा केंद्रबिंदू ठरला.

कोथरूड चरखा संघ गेल्या तीन वर्षांपासून या क्षेत्रात कार्यरत असून, संस्थेच्या माध्यमातून आतापर्यंत तीन ते चार राष्ट्रीय ध्वजांची निर्मिती करण्यात आल्याची माहिती देण्यात आली. कार्यक्रमात जिंदा सांडभोर, अनिल पवार, विशाल वाकडकर, अजिंक्य देसाई, महेश मालुसरे, अमर शिंदे यांच्यासह अनेकांनी चरखा प्रात्यक्षिकात सहभाग घेतला. कार्यक्रमस्थळी पेटी चरख्यासोबत पारंपरिक चरखा आणि अंबर चरखाही ठेवण्यात आला होता.

महिलांना रोजगाराच्या संधी उपलब्ध व्हाव्यात, या उद्देशाने अंबर चरख्याची निर्मिती केल्याची माहिती आयोजकांनी दिली. त्यामुळे चरखा हा केवळ सूत कातण्याचे साधन नसून स्वावलंबन, रोजगार आणि आत्मनिर्भरतेचा संदेश देणारे माध्यम असल्याची अनुभूती नागरिकांना मिळाली. सुमारे एक हजार नागरिकांनी कार्यक्रमाला भेट देत चरख्याची माहिती घेतली. मोबाइल आणि आधुनिक यंत्रांच्या युगात हाताने फिरणाऱ्या चरख्याबाबत पुणेकरांमध्ये निर्माण झालेली उत्सुकता विशेष लक्षवेधी ठरली.

“गेल्‍या तीन वर्षांपासून आम्‍ही महात्‍मा गांधी आणि त्‍यांनी दिलेल्‍या स्‍वदेशीच्‍या नाऱ्यावर काम करत आहे. कोथरूड येथील गांधी भवनमध्ये दर रविवारी संस्‍थेचे पदाधिकारी एकत्र जमतात. चरख्यावर कापूसपासून कापडापर्यंतचा प्रवास आम्‍ही नागरिकांना समजावून सांगत आहे.”
– अमर शिंदे, पदाधिकारी, कोथरूड चरखा संघ