मंचर : आंबेगाव तालुक्यात आठवडाभरापूर्वी झालेल्या मुसळधार पावसामुळे घोडनदीला अभूतपूर्व पूर आला असून, या पुरातून सुमारे अडीच टीएमसी पाणी वाहून गेल्याची माहिती जलसंपदा विभागाने दिली आहे. विशेष म्हणजे, हुतात्मा बाबू गेनू सागर (डिंभे) धरणातून सांडव्यातून कोणतेही पाणी सोडण्यात आले नव्हते. तरीही गोहे खोऱ्यात झालेल्या अतिवृष्टीमुळे घोडनदी दुथडी भरून वाहू लागली.

सद्यस्थितीत पुराचे पाणी ओसरले असले तरी आलेला पूर प्रत्येकाच्या स्मरणात राहील.असे जेष्ठ शेतकऱ्यांनी सांगितले. डिंभे धरणाची पाणीपातळी सुमारे ५० टक्क्यांच्या जवळ असतानाच गोहे खोरे, पिंपळगाव, घोडेगाव, गंगापूर, आमोंडी, नारोडी, साकोरे आदी भागात झालेल्या मुसळधार पावसामुळे सर्व ओढे-नाले तुडुंब भरून वाहू लागले. त्याचे पाणी थेट घोडनदीत आल्याने नदीला मोठा पूर आला.

गेल्या पन्नास वर्षांच्या इतिहासात धरण भरून सांडव्यातून पाणी सोडण्यापूर्वीच घोडनदीला एवढा मोठा पूर आल्याची घटना प्रथमच घडल्याचे जाणकारांनी सांगितले. या पुरातून वाहून गेलेले पाणी नदीपात्रातील सुमारे २५ बंधारे दोन वेळा भरतील इतके असल्याचा अंदाज व्यक्त करण्यात आला आहे. या पाण्यामुळे नदीकाठच्या शेती, रस्ते व काही ठिकाणच्या बंधाऱ्यांचे नुकसानही झाले.

डिंभे धरणातून पाणी न सोडताही गोहे खोऱ्यातील अतिवृष्टीमुळे घोडनदीला मोठा पूर आला. सुमारे अडीच टीएमसी पाणी वाहून गेले असून, ही गेल्या अनेक दशकांतील दुर्मीळ घटना आहे.
-दत्ता कोकणे,अधिकारी, जलसंपदा विभाग निघोटवाडी-मंचर.