Rishabh Pant Breaks MS Dhoni Record Most Test Runs In Away Neutral Matches : भारत आणि श्रीलंका यांच्यातील दुसऱ्या कसोटी सामन्यात भारताचा स्टार यष्टीरक्षक फलंदाज ऋषभ पंतने (Rishabh Pant) एका ऐतिहासिक विक्रमाला गवसणी घातली आहे. पहिल्या दिवशी हाताला चेंडू लागल्यामुळे रिटायर्ड हर्ट झालेल्या पंतने दुसऱ्या दिवशी पुन्हा मैदानात उतरून संयमी अर्धशतक झळकावले. या अर्धशतकी खेळीच्या जोरावर त्याने भारताचा माजी महान कर्णधार महेंद्रसिंह धोनीचा (MS Dhoni) अत्यंत मोठा आणि बहुचर्चित विक्रम मोडीत काढला आहे. पंत आता भारताबाहेर (Away/Neutral) कसोटीत सर्वाधिक धावा करणारा भारतीय यष्टीरक्षक फलंदाज बनला आहे.

धोनीचा २४९६ धावांचा विक्रम इतिहासजमा; पंत अव्वल स्थानी!

परदेशी आणि तटस्थ मैदानांवर (Away/Neutral) खेळताना ऋषभ पंतच्या नावावर आता २,५०२ धावांची नोंद झाली आहे. त्याने आपल्या कारकीर्दीतील अवघ्या ३६ व्या कसोटीत हा पराक्रम केला. यापूर्वी हा विक्रम महेंद्रसिंह धोनीच्या नावावर होता, ज्याने ४८ कसोटी सामन्यांतील ८३ डावांत ३२.८४ च्या सरासरीने २,४९६ धावा केल्या होत्या. पंतने ४१ पेक्षा अधिकच्या धमाकेदार सरासरीने हा टप्पा गाठत धोनीला मागे टाकले. या यादीत फारुख इंजिनिअर (१,२०९ धावा) तिसऱ्या, तर सय्यद किरमाणी (१,१०९ धावा) चौथ्या स्थानावर आहेत.

विदेशात सर्वाधिक ६ शतके; धोनीच्या एकूण विक्रमाचा पाठलाग!

Rishabh Pant now owns the record for the most runs scored by an Indian wicket-keeper in away/neutral Tests.#TeamIndia #RishabhPant #MSDhoni pic.twitter.com/jJlotc1TGu

— Circle of Cricket (@circleofcricket) August 24, 2026

ऋषभ पंतच्या नावावर भारताबाहेर सर्वाधिक ६ कसोटी शतके ठोकण्याचाही दुर्मीळ विक्रम आहे. कसोटी क्रिकेटमध्ये एकूण धावांचा विचार केल्यास पंत सध्या भारताचा दुसरा सर्वात यशस्वी यष्टीरक्षक फलंदाज ठरला आहे. या यादीत धोनी ४,८७६ धावांसह पहिल्या क्रमांकावर विराजमान आहे, तर पंत ३,७०६ धावांसह दुसऱ्या स्थानी पोहोचला आहे. तिसऱ्या क्रमांकावर सय्यद किरमाणी (२,७५९ धावा) आहेत. ज्या वेगाने पंत धावा कुटत आहे, ते पाहता तो लवकरच धोनीचा एकूण धावांचा विक्रमही मोडू शकतो.

हेही वाचा – Jaiswal Fernando Fine : आयसीसीची मोठी कारवाई! यशस्वी जैस्वाल आणि असिथा फर्नांडोला सुनावली ‘ही’ शिक्षा

दुखापतीनंतर दाखवले शौर्य; भारताची मजबूत धावसंख्या –

पहिल्या दिवशी षटकार ठोकण्याच्या नादात हाताला चेंडू लागल्याने पंत अवघ्या ३ धावांवर रिटायर्ड हर्ट होऊन मैदानाबाहेर गेला होता. मात्र, दुसऱ्या दिवशी सारांश जैन बाद झाल्यानंतर त्याने पुन्हा क्रीजवर पाऊल ठेवले आणि भारतीय डावाला आकार दिला. देवदत्त पडिक्कलच्या शतकी खेळीनंतर (११७) पंतच्या या महत्त्वपूर्ण अर्धशतकामुळे भारतीय संघाने पहिल्या डावात श्रीलंकेविरुद्ध विशाल धावसंख्या उभारून सामन्यावर पूर्ण वर्चस्व निर्माण केले आहे.