Rishabh Pant Massive 95 Metre Six Breaks Stadium Solar Panel Lahiru Kumara Colombo Test : भारत आणि श्रीलंका यांच्यातील दुसऱ्या कसोटी सामन्याच्या दुसऱ्या दिवशी भारतीय संघाचा स्टार यष्टीरक्षक फलंदाज ऋषभ पंतच्या (Rishabh Pant) एका अविश्वसनीय षटकाराने संपूर्ण क्रिकेट जगताचे डोळे विस्फारले आहेत. पहिल्या दिवशी हाताला गंभीर दुखापत झाल्यामुळे रिटायर्ड हर्ट झालेल्या पंतने दुसऱ्या दिवशी मैदानात उतरून त्याच गोलंदाजाविरुद्ध रोमहर्षक बदला घेतला. ज्या वेगवान गोलंदाज लाहिरू कुमाराच्या (Lahiru Kumara) बाउन्सरने पंतचे मनगट दुखावले होते, त्याच गोलंदाजाच्या शॉर्ट चेंडूवर पंतने ९५ मीटरचा महाकाय षटकार खेचत चेंडू थेट एसएससी स्टेडियमच्या छतावर धाडला.

९५ मीटरचा मॉन्स्टर षटकार; स्टेडियमच्या सोलर पॅनेलचे केले तुकडे –

सामन्याच्या दुसऱ्या दिवशी सकाळच्या सत्रात सारांश जैन बाद झाल्यानंतर ऋषभ पंत पुन्हा फलंदाजीसाठी मैदानात उतरला. श्रीलंकेच्या वेगवान गोलंदाजांनी त्याच्या दुखापतीचा फायदा घेण्यासाठी सातत्याने शरीरावर आणि छातीवर उसळणाऱ्या शॉर्ट चेंडूंचा मारा सुरू केला. मात्र, लाहिरू कुमाराने पुन्हा टाकलेल्या बाउन्सरवर पंतने चेंडूच्या अचूक लाईनमध्ये येत डोळ्यांचे पारणे फेडणारा उत्तुंग षटकार लगावला. हा चेंडू इतक्या प्रचंड वेगाने आणि लांब उडाला की, तो थेट कोलंबोच्या एसएससी स्टेडियमच्या छतावरील सोलर पॅनेलवर आदळला आणि पॅनेलचे तुकडे झाले.

ज्या चेंडूवर दुखापत, त्यावरच घेतला रोमहर्षक बदला!

The artist has a very distinct style. 🎨 🤭

Watch #SLvIND, 2nd Test, LIVE NOW on Sony Sports Network TV channels & Sony LIV.#SonySportsNetwork #SonyLIV #BeautifulGameOfTestCricket pic.twitter.com/bYd2YpnSuF

— Sony Sports Network (@SonySportsNetwk) August 24, 2026

पहिल्या दिवशी अवघ्या ३ धावांवर खेळत असताना लाहिरू कुमाराचा एक उसळणारा चेंडू थेट पंतच्या मनगटावर आदळला होता. प्रचंड वेदनांमुळे अवघ्या १५ चेंडूंचा सामना करून त्याला ‘रिटायर्ड हर्ट’ होऊन मैदान सोडावे लागले होते. पहिल्या दिवशी फटका खेळताना पंतची घाई झाली होती, मात्र दुसऱ्या दिवशी त्याने पूर्णपणे चेंडूवर नजर ठेवत अचूक टायमिंग साधले आणि कुमाराला थक्क केले. श्रीलंकेचे खेळाडूही हा अवाढव्य फटका केवळ पाहतच राहिले.

हेही वाचा – Jurel Historic Century : ध्रुव जुरेलने झळकावले ऐतिहासिक शतक! जे धोनीलाही जमलं नाही ते करुन दाखवणारा ठरला पहिलाच भारतीय

वेदनांवर मात करत ठोकल्या ६३ धावा –

खेळपट्टीवर असताना पंतला काही चेंडूंचा मार बसला आणि फिजिओकडून उपचारही घ्यावे लागले. मात्र, तरीही आक्रमक पवित्रा न सोडता त्याने आपल्या जिद्दीचे दर्शन घडवले. पंतने संयम आणि आक्रमकतेचा मेळ घालत ६३ धावांची अत्यंत महत्त्वपूर्ण खेळी साकारली. त्याच्या या झुंजार अर्धशतकामुळे आणि ध्रुव जुरेलच्या शतकाच्या जोरावर भारतीय संघाने पहिल्या डावात सहजपणे ५०० धावांचा टप्पा ओलांडून सामन्यावर भक्कम पकड मिळवली.