Nagoya Heavy Rain : एशियन गेम्सआधी जपानमध्ये जलप्रलय! एका तासात कोसळला १०४ मिमी पाऊस; ४०० खेळाडू-कर्मचाऱ्यांची पळापळ
Nagoya Heavy Rain : जपानमधील नागोया येथे २०२६ च्या आशियाई खेळांच्या अगदी आधी, मुसळधार पाऊस आणि पुरामुळे सुमारे ४०० खेळाडू आणि कर्मचाऱ्यांना सुरक्षित स्थळी हलवावे लागले.
Heavy Rain Floods Nagoya Asian Games 2026 Athletes Evacuated Opening Ceremony Safe : जपानमधील नागोया शहरात रंगणाऱ्या आशियाई क्रीडा स्पर्धा २०२६ (Asian Games 2026) सुरू होण्यापूर्वीच निसर्गाच्या कोपाचा मोठा फटका बसला आहे. मंगळवारी शहरात अवघ्या एका तासात तब्बल १०४ मिमी मुसळधार पावसाची नोंद झाली, ज्यामुळे नागोयामध्ये पूरस्थिती निर्माण झाली. परिस्थितीचे गांभीर्य ओळखून प्रशासनाने तात्काळ स्थलांतराचे आदेश जारी केले. ‘गार्डन पिअर’ भागात थांबलेल्या सुमारे ४०० आंतरराष्ट्रीय खेळाडू आणि सपोर्ट स्टाफला सुरक्षेचा उपाय म्हणून तातडीने सुरक्षित आणि उंच ठिकाणी हलवण्यात आले.
दोन तासांत स्थलांतराचा आदेश मागे; खेळाडू सुरक्षितपणे परतले!
पुराची तीव्रता ओसरल्यानंतर सुमारे दोन तासांनी प्रशासनाने स्थलांतराचा आदेश मागे घेतला, ज्यामुळे खेळाडू आणि अधिकारी आपापल्या निवासस्थानी परतले. काही इमारतींच्या छतावरून पाणी गळती झाल्याचे वृत्त असले तरी कोणत्याही खेळाडूला दुखापत झालेली नाही. नागोयाचे महापौर इचिरो हिरोसावा यांनी स्पष्ट केले की, क्रीडा संकुलांचे कोणतेही मोठे नुकसान झालेले नाही. येत्या १९ सप्टेंबर रोजी होणाऱ्या भव्य उद्घाटन सोहळ्यावर या पावसाचा कोणताही परिणाम होणार नसून स्पर्धा नियोजित वेळेनुसारच पार पडेल.
वाहतूक व्यवस्था ठप्प; नदीकाठच्या भागांना सर्वोच्च इशारा!
🚨 JAPAN HIT BY SEVERE FLOODING! 🌊
Nagoya has recorded 104mm of rain in just one hour, with Japan issuing its highest-level rain warning as parts of the city face severe flooding.
Nagoya is host city for the ASIAN GAMES 2026 from September 19 pic.twitter.com/NVZXmV5qVG
— The Khel India (@TheKhelIndia) September 9, 2026
ढगफुटीसदृश पावसामुळे नागोया शहरातील मेट्रो आणि बस सेवा काही काळासाठी पूर्णपणे ठप्प झाली होती. जपानच्या हवामान विभागाने स्थानिक मुख्य नदीसाठी पुराचा सर्वोच्च इशारा जारी केला. स्थानिक माध्यमांच्या माहितीनुसार, सुमारे ३,५०० नागरिकांना तातडीने आपत्कालीन निवारक केंद्रांमध्ये आश्रय घ्यावा लागला. काही स्पर्धा स्थळांमध्ये पावसाचे पाणी शिरले होते; मात्र प्रशासनाने वेळीच उपसा करत संभाव्य धोका टाळला.
पारंपरिक क्रीडा नगरीऐवजी क्रूझ आणि हॉटेल्स; १७ हजार खेळाडूंची उपस्थिती!
🌊🇯🇵 Severe flooding has hit Nagoya after torrential rain dumped around 100 mm in just one hour.
Roads turned into rivers, underground shopping areas were inundated and water entered Sakae Station. Subway and bus services were suspended, although metro operations began restarting…— XPRESS (@Xpress_24_7) September 8, 2026
यंदाच्या आशियाई स्पर्धेत पारंपरिक ‘ॲथलीट्स व्हिलेज’ ऐवजी खेळाडू आणि अधिकाऱ्यांच्या मुक्कामासाठी आलिशान क्रूझ जहाजे, हॉटेल्स आणि तात्पुरती लाकडी घरे तयार करण्यात आली आहेत. या महाकुंभात १७,००० हून अधिक खेळाडू आणि अधिकारी सहभागी होणार आहेत. स्पर्धेचे अधिकृत उद्घाटन १९ सप्टेंबरला होणार असले, तरी बास्केटबॉलसारख्या काही प्राथमिक स्पर्धा गुरुवारपासूनच सुरू होत आहेत.
