मंचर : आंबेगाव तालुक्यात उघडकीस आलेल्या दूध भेसळ प्रकरणाची केवळ वरवर चौकशी न करता संपूर्ण साखळीचा शोध घेऊन मुख्य सूत्रधारांवर कठोर कारवाई करावी,दूध भेसळ प्रकरणाची मुळापर्यंत चौकशी करा.दोषींना कोणताही राजकीय आश्रय नको.अशी मागणी राष्ट्रवादी कॉंग्रेस शरदचंद्र पवार पक्षाचे जिल्हाध्यक्ष देवदत्त निकम यांनी मंगळवार, दि.७ रोजी केली.

भेसळीच्या दूध रॅकेट संदर्भातील सहभागी असणाऱ्यावर कडक कारवाई व्हावी. या मागणीसाठी राष्ट्रवादी कॉंग्रेस शरदचंद्र पवार पक्ष, भाजप, शिंदे शिवसेना आणि ठाकरे शिवसेना या पक्षाच्या प्रमुख कार्यकर्त्यांची बैठक मंचर (ता.आंबेगाव) येथील बाजार समितीच्या सभागृहाच्या बाहेर मोकळ्या जागेत संपन्न झाली.

यावेळी युवा सेना कार्यकारिणी सदस्य सचिन बांगर, उबाठाचे जेष्ठ नेते राजाराम बाणखेले, शिंदे शिवसेनेचे तालुका अध्यक्ष प्रवीण थोरात पाटील, उद्योजक प्रशांत अभंग, नागापूरचे माजी सरपंच गणेश यादव,तालुका राष्ट्रवादी शरदचंद्र पवार पक्षाचे युवक अध्यक्ष विशाल वाबळे,अजित चव्हाण,निलेश वळसे पाटील,सुशांत रोडे आदी मान्यवर उपस्थित होते.

उबाठाचे संपर्क प्रमुख सुरेश भोर म्हणाले डिंभा उजवा कालवा,अवसरी बुद्रुक येथील ओढ्यातील रासायनिक प्रदूषण यांचाही वैज्ञानिक तपास करणे आवश्यक असल्याचे त्यांनी सांगितले. यावेळी शिवसेना शिंदे गटाचे जिल्हा प्रमुख देविदास दरेकर यांनी, “सध्या अटक झालेले आरोपी हे केवळ लहान दुवे असू शकतात. या रॅकेटमागील मुख्य सूत्रधार शोधले गेले पाहिजेत. यावेळी भाजपचे विजय पवार इत्यादींची भाषणे झाली.

आज मोर्चा

दूध प्रकरणातील रॅकेटची चौकशी करावी.या मागणीसाठी मंचर शहरात बुधवार दि.८ रोजी सकाळी अकरा वाजता मोर्चा काढून निषेध करण्यात येणार आहे. त्यानंतर छत्रपती शिवाजी महाराज चौकात सभा होणार आहे, अशी माहिती राष्ट्रवादी कॉंग्रेस शरदचंद्र पवार पक्षाचे जिल्हाध्यक्ष देवदत्त निकम यांनी दिली.