Sharad Kapoor : एकेकाळी बॉलिवूडच्या झगमगत्या दुनियेत आपल्या अभिनयाने आणि रुबाबदार व्यक्तिमत्त्वाने ओळख निर्माण करणारा अभिनेता आज एका भावूक प्रसंगामुळे चर्चेत आला आहे. ‘जोश’ चित्रपटात शाहरुख खानच्या विरोधात गँग लीडरची भूमिका साकारणारा अभिनेता शरद कपूर याचा एक व्हिडीओ सध्या सोशल मीडियावर मोठ्या प्रमाणात व्हायरल होत आहे.

या व्हिडीओमध्ये शरद आपल्या चार पाळीव कुत्र्यांना निरोप देताना अश्रू अनावर झाल्याचे दिसत आहे. हे कुत्रे त्याच्यासाठी केवळ पाळीव प्राणी नसून कुटुंबातील सदस्य आणि मुलांसारखे आहेत.

त्यांच्यापासून काही काळ दूर राहण्याची वेळ आल्याने अभिनेता भावूक झाला. त्याचा बदललेला लूक आणि डोळ्यांत आलेले अश्रू पाहून चाहत्यांनाही धक्का बसला आहे. मात्र, या व्हिडीओमागचे कारण समोर आल्यानंतर शरदच्या परिस्थितीबद्दल चिंता व्यक्त केली जात आहे.

काय आहे नेमकं प्रकरण?

२००० मध्ये प्रदर्शित झालेल्या ‘जोश’ चित्रपटात शरद कपूरने शाहरुख खान आणि ऐश्वर्या राय बच्चन यांच्यासोबत महत्त्वाची भूमिका साकारली होती. या चित्रपटातील त्याची नकारात्मक भूमिका प्रेक्षकांच्या लक्षात राहिली.

त्यानंतरही त्याने अनेक चित्रपटांत काम केले. मात्र, गेल्या काही वर्षांपासून तो चित्रपटसृष्टीत फारसा सक्रिय दिसत नाही. आता त्याचा व्हायरल व्हिडीओ चर्चेत आला आहे.

मिळालेल्या वृत्तांनुसार, शरद कपूर सध्या काही शारीरिक अडचणींचा सामना करत असून त्याला स्वतःच्या आरोग्याकडेही लक्ष देण्याची गरज आहे. घरातील सध्याच्या परिस्थितीत चार कुत्र्यांची योग्य काळजी घेणे कठीण होत असल्याने त्यांना काही काळासाठी प्राणी कल्याण केंद्रात हलवण्याचा निर्णय घेण्यात आला.

शरदची जवळची मैत्रीण आणि ‘बेजुबान पब्लिक वेल्फेअर ट्रस्ट’च्या संस्थापक हेमा चौधरी यांनी सोशल मीडियावर व्हिडीओ शेअर करत यामागची परिस्थिती स्पष्ट केली. या कुत्र्यांची काळजी घेण्यासाठी नियमित मदतनीस उपलब्ध नसल्याने हा निर्णय घेतल्याचे वृत्त आहे.

व्हिडीओमध्ये शरद कपूर आपल्या चारही कुत्र्यांपासून दूर होताना स्वतःला सावरू शकत नाही. यावेळी तो म्हणतो, “सध्या घरातील परिस्थिती थोडी कठीण आहे.

या घरानंतर जेव्हा माझा नवीन बंगला तयार होईल, तेव्हा मी YODA संस्थेला विनंती करेन की कृपया माझ्या मुलांना परत द्या. कारण मी त्यांच्याशिवाय राहू शकत नाही.” आपल्या कुत्र्यांपासून दूर गेल्यानंतर त्यांनाही वाईट वाटेल, अशी भीतीही त्याने व्यक्त केली.

चाहत्यांना भावूक न होण्याचा प्रश्नच नाही!

शरदचा हा व्हिडीओ समोर आल्यानंतर सोशल मीडियावर चाहत्यांनी त्याच्याबद्दल चिंता व्यक्त केली आहे. अनेकांनी त्याच्या उत्तम आरोग्यासाठी शुभेच्छा दिल्या असून, कठीण काळात त्याला पाठिंबा देण्याचे आवाहन केले आहे. हेमा चौधरी यांनीही अभिनेत्याच्या परिस्थितीचा पूर्ण संदर्भ समजून न घेता त्याला ट्रोल करू नये, असे आवाहन केले आहे.