Sinhgad College News : शिक्षक आणि शिक्षकेतर कर्मचाऱ्यांचे वर्षानुवर्षे थकलेले वेतन, संस्थेच्या कारभारातील कथित अनियमितता आणि कर्मचाऱ्यांची आर्थिक कोंडी.. अशा गंभीर प्रश्नांमुळे चर्चेत असलेल्या पुण्यातील सिंहगड टेक्निकल एज्युकेशन सोसायटीला आता मोठा दणका बसला आहे.

कर्मचाऱ्यांच्या वेतनप्रश्नी दाखल याचिकांवर मुंबई उच्च न्यायालयाने दिलेल्या आदेशाच्या पार्श्वभूमीवर राज्याच्या उच्च शिक्षण आणि तंत्रशिक्षण संचालनालयाने कठोर पाऊल उचलले आहे. सिंहगड संस्थेच्या महाविद्यालयांवरील व्यवस्थापनाची जबाबदारी आता प्रशासकांकडे सोपवण्यात आली आहे.

उच्च शिक्षण संचालनालयाच्या अखत्यारितील सात महाविद्यालयांवर तीन वर्षांसाठी प्रशासक नियुक्त करण्यात आले आहेत, तर तंत्रशिक्षण संचालनालयाच्या अखत्यारितील २५ महाविद्यालयांच्या व्यवस्थापनासाठीही प्रशासकांची नियुक्ती करण्यात आली आहे.

त्यामुळे संस्थेच्या एकूण ३२ महाविद्यालयांच्या व्यवस्थापनावर आता प्रशासकीय नियंत्रण राहणार आहे. या निर्णयामुळे सिंहगड संस्थेच्या कारभारात मोठे बदल होण्याची शक्यता असून, कर्मचाऱ्यांचे थकीत वेतन आणि विद्यार्थ्यांचे शैक्षणिक हित याकडे आता प्रशासकांना विशेष लक्ष द्यावे लागणार आहे.

नेमका काय आहे उच्च शिक्षण विभागाचा निर्णय?

उच्च शिक्षण संचालक डॉ. शैलेंद्र देवळाणकर आणि तंत्रशिक्षण संचालक डॉ. प्रमोद नाईक यांनी यासंदर्भात स्वतंत्र परिपत्रके प्रसिद्ध केली आहेत. महाराष्ट्र शैक्षणिक परिसंस्था (व्यवस्थापन) अधिनियम १९७६ मधील कलम ३ (१) अंतर्गत उच्च शिक्षण संचालनालयाच्या अखत्यारित येणाऱ्या सिंहगड संस्थेच्या सात महाविद्यालयांवर तीन वर्षांसाठी प्रशासक नियुक्त करण्याचा निर्णय घेण्यात आला आहे.

या महाविद्यालयांच्या प्रशासकपदाची जबाबदारी पुणे विभागीय उच्च शिक्षण सहसंचालकांकडे सोपवण्यात आली आहे. संबंधित महाविद्यालयांच्या व्यवस्थापनाचा कारभार आता प्रशासकांच्या नियंत्रणाखाली राहणार आहे.

कोणत्या सात महाविद्यालयांवर प्रशासकांची नियुक्ती?

१. सिंहगड विधी महाविद्यालय, आंबेगाव

२. श्रीमती काशीबाई नवले शिक्षणशास्त्र महाविद्यालय, कुसगाव

३. सिंहगड कला आणि वाणिज्य महाविद्यालय, नऱ्हे

४. निवृत्ती बाबाजी नवले वाणिज्य आणि विज्ञान महाविद्यालय, कुसगाव

५. सिंहगड वाणिज्य महाविद्यालय, कोंढवा

६. श्रीमती काशीबाई नवले वाणिज्य महाविद्यालय, एरंडवणे

७. सिंहगड विज्ञान महाविद्यालय, आंबेगाव

तंत्रशिक्षण विभागाच्या २५ महाविद्यालयांचाही कारभार प्रशासकांकडे

केवळ उच्च शिक्षण संचालनालयाच्या अखत्यारितील महाविद्यालयांपुरताच हा निर्णय मर्यादित नाही. तंत्रशिक्षण संचालनालयानेही सिंहगड टेक्निकल एज्युकेशन सोसायटीच्या अखत्यारितील २५ महाविद्यालयांच्या व्यवस्थापनासाठी प्रशासक नियुक्त करण्याचा निर्णय घेतला आहे.

तंत्रशिक्षण विभागीय कार्यालय, पुणे येथील सहसंचालकांकडे प्रशासक म्हणून जबाबदारी सोपवण्यात आली आहे. हा आदेश तातडीने लागू करण्यात आला आहे. या २५ महाविद्यालयांमध्ये अभियांत्रिकी, तंत्रज्ञान, हॉटेल मॅनेजमेंट, औषधनिर्माणशास्त्र तसेच पदविका अभ्यासक्रमांच्या महाविद्यालयांचा समावेश आहे.

कर्मचाऱ्यांच्या थकीत वेतनाचा प्रश्न गंभीर

सिंहगड संस्थेतील शिक्षक आणि शिक्षकेतर कर्मचाऱ्यांचे वेतन अनेक वर्षांपासून थकीत असल्याचा आरोप आहे. वेतन मिळत नसल्याने कर्मचाऱ्यांना आर्थिक अडचणींचा सामना करावा लागत आहे. या प्रश्नावर कर्मचाऱ्यांनी आंदोलनही केले होते.

वेतनाअभावी निर्माण झालेल्या आर्थिक विवंचनेतून १३ हून अधिक कर्मचाऱ्यांनी आत्महत्या केल्याची बाबही याचिकेद्वारे उच्च न्यायालयाच्या निदर्शनास आणून देण्यात आली होती.

या प्रकरणातील गंभीर बाबींची दखल घेत न्यायालयाने कायद्यानुसार कारवाई करण्याचे निर्देश दिले. त्यानंतर उच्च शिक्षण आणि तंत्रशिक्षण संचालनालयाने प्रशासक नियुक्तीचा निर्णय घेतला आहे.

विद्यार्थ्यांच्या शैक्षणिक हितालाही प्राधान्य

संस्थेतील शिक्षक आणि शिक्षकेतर कर्मचाऱ्यांची न्यायालयीन प्रकरणे, वेतनाचा प्रश्न तसेच विद्यार्थ्यांचे शैक्षणिक नुकसान होऊ नये, या बाबी लक्षात घेऊन प्रशासकांची नियुक्ती करण्यात आली आहे.

संस्थेच्या व्यवस्थापनातील प्रश्न सोडवणे, महाविद्यालयांचा नियमित कारभार सुरळीत ठेवणे आणि विद्यार्थ्यांचे शैक्षणिक हित जपणे, ही जबाबदारी आता प्रशासकांवर असेल.

‘न्यायालयाने दिलेल्या आदेशाच्या पार्श्वभूमीवर सार्वजनिक हिताचा विचार करून सिंहगड संस्थेच्या महाविद्यालयांवर प्रशासक नियुक्त करण्याचा निर्णय घेण्यात आला आहे,’ अशी माहिती उच्च शिक्षण संचालक डॉ. शैलेंद्र देवळाणकर यांनी दिली.