Supriya Sule : पुण्यात डीजेविरोधात भूमिका घेणाऱ्या विद्यानंद बापट यांना मारहाण करण्यात आल्यानंतर राजकीय वातावरण चांगलेच तापले आहे. या मारहाणीचा निषेध नोंदवला जात असून, आता या प्रकरणी शरद पवार गटाच्या खासदार सुप्रिया सुळे यांची प्रतिक्रिया समोर आली असून, …तर देशाचे गृहमंत्री अमित शाह यांना फोन करून न्याय मागावा लागेल, अशी संतप्त प्रतिक्रिया त्यांनी दिली आहे.

सुप्रिया सुळे नेमकं काय म्हणाल्या?  (Supriya Sule)

“मारहाण करणं ही निषेधार्ह घटना आहे. आम्ही या घटनेचा निषेध नोंदवत आहोत. हा प्रकार खपवून घेतला जाणार नाही. मारहाण करणाऱ्या व्यक्तीला अटक झालीच पाहिजे. त्याच्या मागे कोणती यंत्रणा काम करत आहे याचा शोध घेतला पाहिजे. पुण्यातील गुंडागर्दी वाढली असून त्याची चौकशी झालीच पाहिजे, असं सांगतानाच हे प्रकार असेच वाढत असतील तर आता मुख्यमंत्र्यांना नाही तर देशाचे गृहमंत्री अमित शाह यांना फोन करून न्याय मागावा लागेल.” अशी प्रतिक्रिया खासदार सुप्रिया सुळेंनी एका वृत्तवाहिनीसोबत बोलताना दिली.

पुणेकरांची बदनामी होत असेल तर…  (Supriya Sule)

सुप्रिया सुळे पुढे म्हणाल्या, या प्रकरणाची मीही माहिती घेत आहे. पण माध्यमांशी बोलताना कुणाला मारणं योग्य नाही. कोण मारतं? कशासाठी मारत आहे? हिंमत कशी होते यांची? एखादी व्यक्ती शांततेने माध्यमांशी बोलत असेल तर लोकशाहीत तो त्याचा अधिकार आहे. ही गुंडागर्दी नाही तर काय आहे.? मारणारा कोण आहे? मारणाऱ्याला अटक केली पाहिजे. त्याच्या मागे कोण आहे? मारहाण करणाऱ्याच्या मागे कोणती ताकद आहे? कोणती यंत्रणा आहे? याचा तपास केला पाहिजे, अशी मागणी त्यांनी केली आहे. माझा जन्म पुण्याचा आहे. पुणे सुसंस्कृत शहर आहे. ही पुण्याची बदनामी करण्याचं षडयंत्र आहे. पुणेकरांची बदनामी होत असेल तर आम्ही कोर्टात जाऊ, असा थेट इशारा देखील सुप्रिया सुळेंनी दिला आहे.