Sunil Gavaskar Slams Foreign Cricketers Over IPL Criticism : आयपीएल आणि बीसीसीआयवर सातत्याने टीका करणाऱ्या परदेशी क्रिकेटपटूंना भारताचे महान फलंदाज सुनील गावस्कर यांनी जोरदार चपराक लगावली आहे. इंग्लंडच्या काही माजी खेळाडूंनी कसोटी क्रिकेटपेक्षा आयपीएलला प्राधान्य देणाऱ्या खेळाडूंवर प्रश्नचिन्ह उपस्थित केले होते. या पार्श्वभूमीवर गावस्करांनी ‘मिड-डे’ मधील आपल्या विशेष कॉलममधून टीकाकारांचा खरपूस समाचार घेतला असून, भारतीय क्रिकेटची ताकद कमी करण्याचा प्रयत्न करणाऱ्यांना आरसा दाखवला आहे.

आर्चर आणि बेथलच्या मुद्द्यावरून वाद!

इंग्लंडचा वेगवान गोलंदाज जोफ्रा आर्चरने न्यूझीलंडविरुद्धची पहिली कसोटी सोडून राजस्थान रॉयल्ससाठी अखेरच्या सामन्यापर्यंत खेळणे पसंत केले होते. तसेच माजी कर्णधार अ‍ॅलिस्टर कुकने युवा खेळाडू जॅकब बेथलला आयपीएल अर्धवट सोडून काउंटी क्रिकेट खेळण्याचा सल्ला दिला होता. मायकेल आथर्टन आणि सायमन डुल यांसारख्या दिग्गजांनीही आयपीएलच्या वाढत्या प्रभावावर चिंता व्यक्त करत या वादाला तोंड फोडले होते.

“बीसीसीआयला शिव्या घालता, पण पैसा तिथूनच घेता!”

Sunil Gavaskar calls out the constant ‘whining and moaning’ about the IPL, BCCI, and Indian cricket. pic.twitter.com/dfgul8bCaf

— Circle of Cricket (@circleofcricket) June 10, 2026

टीकाकारांना सडेतोड उत्तर देताना सुनील गावस्कर म्हणाले, “भारतीय क्रिकेट आणि बीसीसीआयला सतत कोसत राहणे हा काहींचा आवडता छंद झाला आहे. परंतु, जेव्हा कमाईची (महसूल) वेळ येते, तेव्हा या सगळ्यांना बीसीसीआयकडेच यावे लागते. कारण भारतीय क्रिकेट आणि येथील कोट्यवधी प्रेक्षक हेच त्यांच्या कमाईचे सर्वात मोठे साधन आहेत. आयपीएलमुळे आमचे खेळाडू देशासाठी उपलब्ध राहत नाहीत, अशी रडगाणी गाणारे लोक स्वतःच्या बोर्डाला मिळणाऱ्या पैशांवर मात्र सोयीस्करपणे गप्प बसतात.”

हेही वाचा – Manav Suthar Destiny : मुल्लानपूर कसोटी गाजवणाऱ्या मानव सुथारचं नशीब चमकलं! कसोटी रँकिंगमध्ये येताच इंग्लंडमधून आली मोठी ऑफर

केवळ आयपीएलच देते परदेशी बोर्डांना १० टक्के रक्कम!

गावस्करांनी एका मोठ्या सत्याचा खुलासा करत परदेशी क्रिकेट बोर्डांचा दुटप्पीपणा उघड केला. ते म्हणाले, “आयपीएलमध्ये खेळणाऱ्या प्रत्येक परदेशी खेळाडूच्या एकूण फीमधील १० टक्के हिस्सा बीसीसीआय संबंधित देशाच्या क्रिकेट बोर्डाला देतो. ही रक्कम दरवर्षी १ मिलियन पाउंड्सपेक्षाही (कोट्यवधी रुपये) जास्त असते. इंग्लंडची ‘द हंड्रेड’, ऑस्ट्रेलियाची ‘बीबीएल’ किंवा जगातील इतर कोणतीही टी-२० लीग विदेशी खेळाडूंच्या बोर्डाला असा एकही रुपया देते का? याचे उत्तर ‘नाही’ असे आहे. फक्त आयपीएल हा नियम पाळते, तरीही बीसीसीआयवर चिखलफेक केली जाते. मित्रांनो, आता तरी भानावर या आणि वास्तव स्वीकारा. तुम्ही कितीही प्रयत्न केले तरी भारतीय क्रिकेटच राज्य करणार आहे.”