Sunetra Pawar – पीएमआरडीए क्षेत्रात वेगाने वाढणारी लोकसंख्या आणि भविष्यातील नागरी विस्तार लक्षात घेता पिण्याच्या पाण्याचा प्रश्न आतापासूनच दीर्घकालीन नियोजनातून सोडवावा. त्यासाठी नवीन पाण्याचे स्त्रोत उपलब्ध करावेत. नवीन नागरी वसाहती, औद्योगिक क्षेत्रे, पर्यटनस्थळे आणि वाढणाऱ्या लोकसंख्येला आवश्यक पाणीपुरवठा करण्यासाठी उपलब्ध जलस्रोत,

वितरण व्यवस्था आणि भविष्यातील गरजांचा विचार करून नियोजन करण्याची आवश्यकता असल्याचे उपमुख्यमंत्री सुनेत्रा पवार यांनी सांगितले. सह्याद्री राज्य अतिथीगृह येथे पीएमआरडीए क्षेत्रातील विविध विकासकामांचा आढावा उपमुख्यमंत्री सुनेत्रा अजित पवार यांनी घेतला. या वेळी पीएमआरडीएच्या माध्यमातून सुरू असलेल्या, तसेच प्रस्तावित विविध प्रकल्पांचा आढावा घेतला.

या बैठकीस उपमुख्यमंत्र्यांचे सचिव डॉ. राजेश देशमुख, पीएमआरडीएचे आयुक्त डॉ. अभिजित चौधरी यांच्यासह पीएमआरडीएचे संबंधित विभागप्रमुख उपस्थित होते. उपमुख्यमंत्री पवार म्हणाल्या, की पीएमआरडीएच्या कार्यक्षेत्रात ६७४ गावांचा समावेश असून, सुमारे ५,२१५ चौरस किलोमीटर क्षेत्राचा समावेश आहे. वाढती लोकसंख्या, औद्योगिकीकरण,

नागरीकरण आणि पर्यटनाच्या वाढत्या संधी लक्षात घेऊन पुढील अनेक वर्षांचा विचार करून पायाभूत सुविधांचे नियोजन करावे. हा विकास केवळ रस्ते आणि इमारतींपुरता मर्यादित न राहता वाहतूक, पाणी, पर्यावरण, अग्निसुरक्षा, उद्योग, पर्यटन आणि नागरिकांच्या जीवनमानाचा सर्वंकष विचार करणारा असावा, अशा स्पष्ट सूचना पवार यांनी दिल्या.

मेट्रो लाइन- ३ चे काम पूर्ण करा
माण- हिंजवडी परिसरातील वाढती वाहतूक कोंडी लक्षात घेता माण- हिंजवडी- शिवाजीनगर पुणे मेट्रो लाइन-३ चे काम तातडीने पूर्ण करण्यासाठी आवश्यक कार्यवाही करावी, असे निर्देश उपमुख्यमंत्री पवार यांनी दिले. या २३ स्थानकांच्या मेट्रो मार्गिकेतील १२ स्थानके पूर्ण झाली असून, आणखी ५ स्थानकांचे काम अंतिम टप्प्यात असल्याची माहिती या वेळी देण्यात आली.