Tukaram Mundhe : दिवाळीचा सण तोंडावर आला असताना बाजारात मिठाई, फराळ, फरसाण आणि विविध खाद्यपदार्थांची कोट्यवधी रुपयांची उलाढाल सुरू झाली आहे. मात्र, नागरिकांच्या जिवाशी खेळून सणासुदीच्या दिवसांत भेसळयुक्त मालाचा खप करणाऱ्या नफेखोरांवर आता अन्न व औषध प्रशासनाने (एफडीए) थेट नजर रोखली आहे.

एफडीएचे आयुक्त तुकाराम मुंढे (Tukaram Mundhe) यांनी भेसळखोरांविरोधात एक अत्यंत व्यापक आणि धडक मोहीम उघडली असून, स्वतः पत्रकार परिषदेत घेत आगामी कारवाईची घोषणा केल्याने व्यापाऱ्यांचे धाबे दणाणले आहेत.

सणासुदीच्या काळात तारीख संपलेले, निकृष्ट दर्जाचे आणि घातक रसायने वापरलेले खाद्यपदार्थ सर्रास बाजारात आणले जातात, ज्यामुळे नागरिकांच्या आरोग्याला गंभीर धोका निर्माण होतो. नेमकी हीच बाब हेरून तुकाराम मुंढे यांनी दिवाळी संपेपर्यंत ही धडक कारवाई अधिक तीव्र करण्याचे स्पष्ट आदेश दिले आहेत. विशेषतः फराळ, मिठाई, चकली, चिवडा यांसारख्या पदार्थांची कसून चौकशी आणि तपासणी आता राज्यभरात (Tukaram Mundhe) केली जाणार आहे.

केवळ इशारा देऊन न थांबता एफडीएने प्रत्यक्ष कारवाईचा सपाटा आधीच सुरू केला आहे. ऐन दिवाळीत मसाल्यांमध्ये होणारी मोठी भेसळ रोखण्यासाठी राज्यभरातील तब्बल १,०५७ मसाला आस्थापनांवर धाडी टाकण्यात आल्या. या तपासणीत धक्कादायक बाबी समोर आल्यानंतर ९४ आस्थापनांचे परवाने तत्काळ निलंबित करण्यात आले आहेत. याशिवाय विविध कारखाने आणि गोदामांवर छापे टाकून तब्बल ११,९६३ क्विंटल भेसळयुक्त मसाले जप्त करण्यात आले असून, जप्त केलेल्या या मालाची किंमत तब्बल १९.६९ कोटी रुपये इतकी आहे.

आयुक्त तुकाराम मुंढे (Tukaram Mundhe) यांच्या या आक्रमक पावलामुळे आता नियम धाब्यावर बसवणाऱ्या व्यापारी आणि दुकानदारांचे धाबे दणाणले आहेत. दिवाळी संपेपर्यंत एफडीएचे पथक नेमके कुठे आणि कोणावर छापा टाकणार, याबाबत बाजारात प्रचंड सस्पेन्स निर्माण झाला असून भेसळ करणाऱ्यांचे धाबे पुरते दणाणले आहेत.