Sugarcane Fire – आंबेगाव तालुक्याच्या पूर्व भागातील शिंगवे येथील साकोरे मळा परिसरात विजेच्या तारांमध्ये घर्षण होऊन लागलेल्या भीषण आगीत तीन शेतकऱ्यांचा सुमारे चार एकर ऊस जळून खाक झाला. ही दुर्दैवी घटना शुक्रवार (दि. २५) रोजी दुपारी साडेतीन वाजण्याच्या सुमारास घडली. तोंडाशी आलेला घास आगीच्या भक्ष्यस्थानी पडल्याने संबंधित शेतकऱ्यांचे मोठे आर्थिक नुकसान झाले आहे.

साकोरे मळा परिसरातील उसाच्या शेतावरून महावितरणच्या विद्युत तारा गेलेल्या आहेत. शुक्रवारी दुपारी या तारांमध्ये अचानक घर्षण होऊन ठिणग्या उडाल्या आणि खाली उभ्या असलेल्या उसाने पेट घेतला. जोरदार वाऱ्यामुळे काही क्षणांतच आगीने रौद्ररूप धारण केले आणि आग वेगाने पसरत गेली.

​या दुर्घटनेत दिनकर शंकर वाव्हळ यांचा सुमारे तीन एकर ऊस जळून खाक झाला. आगीची तीव्रता एवढी प्रचंड होती की, लगतच्या शेतांनाही त्याची झळ बसली. यात मयूर उत्तम वाव्हळ यांचा अर्धा एकर आणि भाऊ हरिभाऊ वाव्हळ यांचा अर्धा एकर ऊस पूर्णपणे जळून नुकसान झाले. अशा प्रकारे तिन्ही शेतकऱ्यांचे मिळून सुमारे चार एकर क्षेत्र आगीच्या भक्ष्यस्थानी पडले.

​तोंडाशी आलेला घास हिरावला
नुकसानग्रस्त तिन्ही शेतकऱ्यांचा ऊस तोडणीस आला होता. पुढील काही दिवसांतच प्रत्यक्ष तोडणी सुरू होणार होती. मात्र, तोडणीपूर्वीच लागलेल्या आगीमुळे शेतकऱ्यांचे वर्षभराचे कष्ट आणि केलेला मोठा खर्च वाया गेला आहे. वाढत्या उत्पादन खर्चामुळे बळीराजा आधीच आर्थिक संकटात असताना या घटनेने त्यांच्यावर मोठे संकट ओढवले आहे. ​महावितरण व महसूल प्रशासनाने तातडीने घटनास्थळाची पाहणी करून पंचनामा करावा आणि नुकसानग्रस्त शेतकऱ्यांना तात्काळ शासकीय भरपाई द्यावी, अशी जोरदार मागणी शिंगवे परिसरातील ग्रामस्थ व शेतकरी वर्गातून केली जात आहे.