ST Bus Issue – वाई तालुक्याच्या पूर्व भागातील अनेक गावे व वाडी-वस्त्यांमध्ये मागील काही वर्षांपासून एसटी बससेवेचा बोजवारा उडाला आहे. त्यामुळे नागरिक, महिला, ज्येष्ठ नागरिक तसेच शाळा, महाविद्यालये आणि खाजगी क्लासेससाठी ये-जा करणारे विद्यार्थी मोठ्या अडचणीत सापडले आहेत. विशेषतः भुईंज साखर कारखाना फाटा येथे दररोज सकाळी आणि सायंकाळी शेकडो विद्यार्थी एसटी बसची तासनतास वाट पाहताना दिसून येत आहेत.

शाळा, महाविद्यालये आणि खासगी क्लासेस सुटल्यानंतर विद्यार्थ्यांना घरी परतण्यासाठी एसटी बस उपलब्ध नसल्याने त्यांना खाजगी वाहनांचा आधार घ्यावा लागत आहे. त्यामुळे पालकांना आर्थिक भुर्दंड पडत असून विद्यार्थ्यांच्या सुरक्षिततेचाही प्रश्न निर्माण झाला आहे. ग्रामीण भागातील अनेक कुटुंबांची आर्थिक परिस्थिती हलाखीची असल्याने दररोजचा अतिरिक्त प्रवास खर्च त्यांना परवडत नाही.

महिलांना बाजारपेठ, शासकीय कार्यालये, आरोग्य केंद्रे तसेच दैनंदिन कामांसाठी वाई शहरात ये-जा करावी लागते. मात्र नियमित बस सेवा नसल्याने त्यांनाही मोठा मनस्ताप सहन करावा लागत आहे. अनेक वेळा नागरिकांना रस्त्यावर बराच वेळ उभे राहून वाहनांची प्रतीक्षा करावी लागत असल्याची ग्रामस्थांची तक्रार आहे. या गंभीर समस्येची दखल घेत वाई तालुक्याच्या पूर्व भागातील विविध ग्रामपंचायतींनी एकत्रितपणे वाई व सातारा आगार व्यवस्थापकांना दिलेल्या निवेदनात पूर्वीप्रमाणे नियमित एसटी बस फेर्‍या सुरू कराव्यात, अशी मागणी करण्यात आली आहे.

…अन्यथा लोकशाही मार्गाने आंदोलन
गेल्या कित्येक वर्षांपासून देगाव, बेलमाची, लगडवाडी, खोलवडी, चांदवडी, वेलंग, भिवडी, रेणावळे या गावांसह वाई तालुक्याच्या पूर्व भागातील विद्यार्थ्यांना शालेय शिक्षणासाठी भुईंज, पाचवड, वाई, सातारा याठिकाणी जावे लागते मात्र, वाई आगाराच्या एसटी बसच्या मनमानी कारभारामुळे विद्यार्थ्यांना एसटी बस सेवेपासून वंचित राहावे लागत आहे. त्यामुळे येत्या आठ दिवसांत वाई आगार प्रमुखांनी तालुक्याच्या पूर्व भागातील विद्यार्थ्यांना एसटी बस उपलब्ध करून द्यावी अन्यथा लोकशाही मार्गाने आंदोलन करण्याचा इशारा सामाजिक कार्यकर्ते संतोष शिंदे यांनी दिला आहे.