Satara Municipal Council – सातारा नगरपालिकेने वाजत-गाजत भुयारी गटारी योजना काळ्या यादीत टाकण्याचा ठराव केला आहे आणि हा ठराव काहीच दिवसात बदलण्याच्या हालचाली नगरपालिकेमध्ये सुरू झालेल्या आहेत. ज्या ठेकेदाराने काम व्यवस्थित केलेले नाही त्या ठेकेदाराला पुन्हा सन्मानाने मुदतवाढ देण्याचा घाट घातला जात असल्याचा आरोप सामाजिक कार्यकर्ते सुशांत मोरे यांनी केला.

काळ्या यादीत घालण्याचा ठराव परस्पर जर बदलला गेला तर सातारा पालिकेतील सर्व नगरसेवकांना अपात्र करण्यासाठी स्वतंत्र याचिका दाखल करणार असल्याची माहिती मोरे यांनी दिली. भुयारी गटार योजनेचे फक्त 60 टक्के काम पूर्ण झालेले आहे आणि 60 टक्के काम पूर्ण झालेला असताना सुद्धा आधीच 90 टक्के पेमेंट अदा केले गेले आहे. यामध्ये सुद्धा अनेक लोक दोषी आहेत.

भुयारी गटार योजना ही सातारा शहराच्या दृष्टीने अतिशय महत्त्वाची आणि खा. उदयनराजे भोसले यांचा ड्रीम प्रोजेक्ट आहे आणि त्यामुळे या योजनेच्या कामाचे श्रेय कुणी घेऊ दे पण काम हे व्यवस्थित आणि दर्जेदार होण्याची गरज आहे. नगरपालिकेने या ठेकेदाराला काळ्या यादीत टाकण्याचा ठराव जनरल बॉडीमध्ये केला तो स्वागतहार्य आहे, होता आणि ती चांगली कृती होती मात्र,

अचानक पण कुठून तरी सूत्र हलली आणि पुन्हा काळ्या यादीतले शब्द बदलण्याची तयारी सुरू झाली. त्यासाठी दोन्ही राजांच्या समर्थकांमध्ये गोपनीय जोर बैठका सुद्धा झाल्या आहेत. आणि या बैठकांनंतर सगळे चित्र बदलले. नगरपालिकेने अशी भूमिका घेणे अत्यंत चुकीचे आहे. कुठल्याही परिस्थितीत जर ठराव बदलला तर तो हा फसवणूक ठरेल आणि फक्त ती बोलण्याची फसवणूक ठरणार नाही तर कायदेशीर फसवणूक ठरेल.

त्यामुळे त्या बाबतीमध्ये टोकाची भूमिका घेऊन मी लढाई करणार आहे. ठेकेदाराच्या भल्यासाठी पदाधिकार्‍यांनी आणि नगरसेवकांनी काम करू नये. मुख्यधिकारी आणि सभा सचिव यांनी या ठरवामध्ये हेराफेरी केल्यास त्यांचे निलंबनची मागणी नगरविकास विभागाकडे करणार आहे. याबाबत मी मोठा लढा देणार आहे असा दावा सुशांत मोरे यांनी केला आहे

योग्य वेळी त्या चौघांची नावे उघड करणार…
नगरपालिकेतील प्रमुख पदाधिकारी यांनी एकत्रित बैठक घेऊन ठेकेदाराबरोबर समन्वय साधला आहे. आतल्या हाताने सगळे हिशोब पूर्ण करून ठेकेदाराला काम करण्यासाठी परवानगी देण्यात आली आहे. एका विचाराचे दोन आणि दुसर्‍या विचाराचे दोन असे चार जणांनी मिळून हा कारभार केल्याची पालिका वर्तुळत चर्चा आहे. योग्य वेळी त्या चौघांची नावे मी समाजासमोर उघड करणार आहे असा इशारा सुशांत मोरे यांनी दिला.