प्रभात वृत्तसेवा रांजणगाव गणपती – सोनेसांगवी (ता. शिरूर) येथे मेघना ईश्वर काळे या दिव्यांग मुलीवर हिंस्र श्वापदाने हल्ला केल्याची हृदयद्रावक घटना घडली आहे. या भीषण हल्ल्यात तिचा जागीच मृत्यू झाला असून, या घटनेमुळे संपूर्ण परिसरात शोककळा पसरली आहे. घटनेची माहिती मिळताच वनविभागाच्या अधिकाऱ्यांनी आणि पोलिसांनी तातडीने घटनास्थळी धाव घेत परिस्थितीची पाहणी केली. पशुवैद्यकीय अधिकाऱ्यांनी मृतदेहाचे शवविच्छेदन करून तपासणीसाठी आवश्यक नमुने गोळा केले आहेत. हा हल्ला नेमका कोणत्या प्राण्याने केला, याचा अधिकृत अहवाल अद्याप प्राप्त झालेला नाही. याप्रकरणी रांजणगाव एमआयडीसी पोलीस ठाण्यात आकस्मित मृत्यूची नोंद करण्यात आली आहे. खबरदारीचा उपाय म्हणून वनविभागाने परिसरात गस्त वाढवली असून, ग्रामस्थांनी विशेषतः रात्रीच्या वेळी सुरक्षिततेच्या नियमांचे पालन करावे, असे आवाहन प्रशासनाच्या वतीने करण्यात आले आहे. स्थानिक ग्रामस्थांनी या घटनेबद्दल तीव्र दुःख व्यक्त केले असून, संबंधित हिंस्र प्राण्याचा तात्काळ बंदोबस्त करावा आणि परिसरात कायमस्वरूपी सुरक्षा उपाययोजना राबवाव्यात, अशी मागणी केली आहे. पोलीस आणि वनविभागाचे पथक या प्रकरणाचा अधिक तपास करत आहेत. “हल्ला बिबट्याने केला की, अन्य कोणत्या प्राण्याने? याबाबत सध्या संशय कायम असून, यासंदर्भात अधिकृत निष्कर्ष राखीव ठेवण्यात आला आहे. वनविभाग व पशुवैद्यकीय अधिकाऱ्यांनी घेतलेले नमुने व तपासणी अहवाल प्राप्त झाल्यानंतरच हल्ल्याचे नेमके कारण व प्राणी कोणता होता हे स्पष्ट होणार आहे. तोपर्यंत कोणताही तर्कवितर्क न करता नागरिकांनी प्रशासनाच्या सूचनांचे पालन करावे.” – महादेव वाघमोडे, पोलीस निरीक्षक
