Sinhagad Fort – मागील काही दिवसांत सिंहगड किल्ल्याच्या परिसरात काही अनुचित घटना घडल्या असून, त्याबाबत संबंधित कायद्यान्वये गुन्हा दाखल करण्यात आला आहे. अशा घटनांची पुनरावृत्ती होऊ नये, तसेच किल्ल्यावर कायदा आणि सुव्यवस्था अबाधित राहावी, यासाठी वन विभागाकडून गर्दी होणाऱ्या पॉइंटवर सुरक्षारक्षक वाढवण्यात येणार आहे. याशिवाय येत्या काही दिवसांत गडावर जाण्यासाठी प्रवेश नोंदणी करावी लागणार असून,

मर्यादित प्रवेश देण्यासाठी ऍप विकसित करण्याचे काम अंतिम टप्प्यात आहे. सिंहगड हा ऐतिहासिक, सांस्कृतिकदृष्ट्या महत्त्वाचा किल्ला असून, पावसाळ्यासह शनिवार, रविवार आणि शासकीय सुट्टीच्या दिवशी मोठ्या प्रमाणात पर्यटक किल्ल्यास भेट देतात. त्यामुळे परिसरात मोठ्या प्रमाणात गर्दी आणि वाहतूक कोंडी होते. सध्या किल्ल्यावर येणाऱ्या पर्यटकांची संख्या, वाहनांची संख्या व गर्दीचे नियमन अधिक प्रभावीपणे करता यावे,

यासाठी सीसीटीव्ही कॅमेरा आणि एआय डिजिटल मॉनिटरिंग यंत्रणा विकसित करण्याचे काम सुरू आहे. या ऍपमध्ये पार्किंग व्यवस्था पर्यटक, तसेच गडावरील महत्त्वाच्या स्थळांबाबत माहिती देण्यात येईल. भविष्यात किल्ल्यावर जाण्यापूर्वी पर्यटकांना गर्दीची स्थिती आणि प्रवेशाबाबतची माहिती उपलब्ध होण्यासाठी मोबाइल ऍप विकसित करण्याची प्रक्रिया अंतिम टप्प्यात असल्याचे वन विभागाने सांगितले आहे. पर्यटकांची निर्धारित क्षमता लक्षात घेऊन प्रवेश नियंत्रित केले जातील. त्यानंतर येणाऱ्या पर्यटकांना तात्पुरता प्रवेश मिळणार नाही. असहकार्य करणाऱ्यांवर गुन्हे दाखल करण्यात येतील, असा इशाराही वन विभागाने दिला आहे.