Shivajirao Kardile : अहिल्यानगर जिल्ह्यातील भाजपचे ज्येष्ठ नेते आणि राहुरी विधानसभा मतदारसंघाचे विद्यमान आमदार शिवाजीराव भानुदास कर्डिले (वय ६७) यांचे हृदयविकाराच्या तीव्र झटक्याने शनिवार, १८ ऑक्टोबरच्या पहाटे अकस्मात निधन झाले. राजकारणातील संघर्ष आणि जनसंपर्काने घडलेले हे परखड नेतृत्व हरपल्याने जिल्ह्यात शोककळा पसरली आहे. कर्डिले यांच्या निधनाने भाजपसह विविध पक्षांच्या नेत्यांनी शोक व्यक्त केला असून, त्यांच्या कुटुंबाला आधार देण्याचे आश्वासन दिले आहे. कर्डिलेंचा अंतःकरणाला स्पर्श करणारा क्षण कर्डिले यांची तब्येत काही महिन्यांपूर्वी मोठ्या आजारपणातून बरी झाली असली, तरी डॉक्टरांनी त्यांना पूर्ण विश्रांती घेण्याचा सल्ला दिला होता. मात्र, लोकांमध्ये मिसळण्याची त्यांची आस आणि जनतेशी जोडलेली नाळ शेवटपर्यंत कायम राहिली. गुरुवार, १७ ऑक्टोबर रोजी ते दिवसभर विविध कार्यक्रमांना उपस्थित होते. शिर्डीजवळील अस्तगाव येथे विखे पाटलांच्या जनसेवा फाउंडेशनच्या वतीने आयोजित शिवमहापुराण कथेला त्यांनी हजेरी लावली. दुपारी सुमारे तीन वाजता ते लोणी येथे विखे पाटलांच्या निवासस्थानी पंडित प्रदीप मिश्रा यांच्या दर्शनासाठी गेले. यावेळी माजी खासदार सुजय विखे पाटील यांनी कर्डिले यांचा हात धरून पायऱ्या उतरवल्या, जो एक हृदयस्पर्शी क्षण ठरला. भाजप आणि शिवसेनेचे अनेक मान्यवर आमदारही उपस्थित होते. या कार्यक्रमांनंतर पहाटे अचानक कर्डिले यांची तब्येत खालावली. त्यांना तात्काळ अहिल्यानगर शहरातील एका खासगी रुग्णालयात दाखल करण्यात आले, मात्र त्यापूर्वीच त्यांनी डोळे मिटून घेतले. डॉक्टरांनी हृदयविकाराचा तीव्र झटका कारणीभूत असल्याचे सांगितले. कर्डिले यांचे दीर्घकाळापासून मणक्यांच्या आजाराने ग्रस्त होते आणि गेल्या वर्षभरात ते सार्वजनिक जीवनापासून दूर होते, तरीही त्यांची सक्रियता कधीच मंदावली नाही. अंत्यविधीसाठी मोठ्या नेत्यांची उपस्थिती कर्डिले यांच्या निधनाची बातमी पसरताच बुऱ्हाणनगर येथील त्यांच्या निवासस्थानी कार्यकर्ते आणि समर्थकांची गर्दी झाली. शनिवार संध्याकाळी ७.३० वाजता होणाऱ्या अंत्यविधीसाठी मुख्यमंत्री देवेंद्र फडणवीस विशेष पाहुणचार घेणार आहेत. मंत्री राधाकृष्ण विखे पाटील, पंकजा मुंडे, जयकुमार रावल आणि राम शिंदे यांच्यासह विविध पक्षांचे नेते उपस्थित राहणार आहेत. शिवाजीराव कर्डिले यांच्या जाण्याने अहिल्यानगर जिल्ह्याने एका संघर्षवीर नेत्याला गमावले आहे. त्यांच्या ‘जनता दरबार’ आणि लोकसंग्रहाच्या आठवणींना उजाळा देत कार्यकर्ते त्यांच्या वारशाला पुढे चालवण्याचे आश्वासन देत आहेत. दुधाच्या रतीबापासून राजकीय उंचीपर्यंत शिवाजी कर्डिले यांचा मूळ व्यवसाय होता दूध विक्री. गावातील सरपंच म्हणून काम करताना ते स्वतः दुधाचे रतीब घालायचे. साधा पांढरा कुर्ता-पायजमा, गांधी टोपी, माथ्यावर वारकरी टिळा आणि पायात साधी चप्पल असा त्यांचा पेहराव होता. जिल्हाधिकारी, तहसीलदार, प्रांताधिकारी यांच्या घरापर्यंत दूध पुरवठा करताना त्यांचा प्रशासनातील अधिकाऱ्यांशी संपर्क वाढला. यातूनच त्यांनी गावातील छोटी-मोठी कामे मार्गी लावण्यास सुरुवात केली. “हा दुधवाला काम मार्गी लावतो,” अशी चर्चा गावात पसरली आणि त्यांचा जनसंपर्क वाढत गेला. काम मार्गी लावण्याची हातोटी आणि प्रशासनाशी असलेल्या ओळखींमुळे कर्डिले यांच्याकडे ग्रामस्थांची गर्दी वाढली. सरपंचपदाच्या अनुभवातून त्यांना प्रशासकीय कामांचा पाठपुरावा कसा करावा, याची जाण आली. अधिकाऱ्यांशी जपलेल्या नात्यामुळे आणि काम पूर्ण झाल्यावर आभार व्यक्त करण्याच्या सवयीमुळे त्यांची विश्वासार्हता वाढली. याच जनसंपर्काच्या जोरावर त्यांनी 1995 मध्ये नगर-नेवासा मतदारसंघातून अपक्ष उमेदवारी अर्ज करत पहिला विजय मिळवला. 1999 मध्येही त्यांनी अपक्ष म्हणून विजय मिळवला आणि शिवसेनेला बाहेरून पाठिंबा दिला. पुढे ते राज्यमंत्री झाले आणि त्यांना मत्स्य व बंदरे विकास खाते मिळाले. राष्ट्रवादी ते भाजप, राजकीय वाटचाल 2009 मध्ये कर्डिले यांनी राष्ट्रवादी काँग्रेसमध्ये प्रवेश केला आणि त्याच वर्षी लोकसभा निवडणूक लढवली, पण भाजपच्या दिलीप गांधी आणि राजीव राजळे यांच्याकडून त्यांचा पराभव झाला. मतदारसंघ पुनर्रचनेनंतर राहुरी-नगर-पाथर्डी हा नवीन मतदारसंघ निर्माण झाला. यावेळी त्यांनी 2009 मध्ये राष्ट्रवादी सोडून भाजपमध्ये प्रवेश केला आणि 2009, 2014 मध्ये आमदारकी जिंकली. मात्र, 2019 मध्ये प्राजक्त तनपुरेंकडून त्यांना पराभव पत्करावा लागला. तरीही 2024 मध्ये त्यांनी सूक्ष्म नियोजन आणि जनसंपर्काच्या बळावर पुन्हा विजय मिळवला. सहा वेळा आमदारकी लढवताना त्यांचा फक्त 2019 मध्येच पराभव झाला.
