Shirur News – शिरूर तालुक्यातील चांडोह येथील जिल्हा परिषद शाळेला अज्ञात समाजकंटकाकडून कुलूप लावल्याचा धक्कादायक प्रकार सोमवारी (दि.३१) रोजी सकाळी उघडकीस आला. शाळेच्या गेटला कुलूप असल्याने शाळेत आलेल्या तब्बल ९१ विद्यार्थ्यांना रस्त्यावरच उन्हात शाळा भरविण्याची वेळ आली. या प्रकारामुळे विद्यार्थी, शिक्षक तसेच पालकांमध्ये संतापाचे वातावरण निर्माण झाले आहे.

शांताराम पानमंद दादाभाऊ पानमंद यांनी तातडीने गुन्हा दाखल करण्याची मागणी केली आहे. चांडोह येथील जिल्हा परिषद शाळेत परिसरातील ९१ विद्यार्थी शिक्षण घेत आहेत. नेहमीप्रमाणे विद्यार्थी सकाळी शाळेत दाखल झाले. मात्र शाळेच्या दरवाजाला कुलूप लावल्याचे निदर्शनास आले. त्यामुळे शिक्षक व विद्यार्थ्यांना शाळेच्या इमारतीत प्रवेश करता आला नाही. विद्यार्थ्यांचे शैक्षणिक नुकसान होऊ नये म्हणून शाळेचा वर्ग रस्त्यावरच भरविण्याची वेळ शिक्षकांवर आली.

रस्त्यावर बसून शिक्षण घेणाऱ्या विद्यार्थ्यांचे चित्र पाहून पालकांमध्ये संतापाचा सूर उमटला. शाळेला परस्पर कुलूप लावण्याचा अधिकार संबंधित व्यक्तीला कोणी दिला, असा सवाल संतप्त पालकांनी उपस्थित केला आहे. शाळेचे कामकाज बंद पाडण्याचा प्रयत्न करणाऱ्या अज्ञात व्यक्तीचा शोध घेऊन त्याच्यावर तातडीने गुन्हा दाखल करावा, अशी मागणी पालकांनी केली आहे.

विद्यार्थ्यांच्या उज्जवल भवितव्याचा मार्ग असलेल्या शाळेच्या इमारतीला अशा प्रकारे कुलूप लावले जात असेल, तर प्रशासन याकडे गांभीर्याने पाहणार कधी, असा संताप पालकांनी व्यक्त केला आहे. या प्रकारामुळे विद्यार्थ्यांच्या सुरक्षिततेचाही प्रश्न निर्माण झाला असून, भविष्यात अशा घटना घडू नयेत यासाठी प्रशासनाने ठोस उपाययोजना करण्याची मागणी होत आहे. ९१ विद्यार्थ्यांना वर्गखोल्यांऐवजी रस्त्यावर बसून शिक्षण घ्यावे लागल्याने शिक्षण व्यवस्थेची चिरफाड झाली असल्याचे चित्र चांडोह येथे दिसून आले. प्रशासनाने तातडीने दखल घेऊन चौकशी करावी, अशी मागणी होत आहे.