Shirur Crime – शिरूर तालुक्यातील टाकळी हाजी पोलीस दूरक्षेत्राच्या हद्दीत चोरट्यांनी उच्छाद मांडला असून ग्रामीण भागात भीतीचे वातावरण निर्माण झाले आहे. मलठण, कवठे येमाई, सविंदणे परिसरात चार दिवसांत पाच रोहित्र फोडून त्यातील तांब्याच्या तारांची चोरी केली तर दुसरीकडे कवठे येमाई येथे भरदिवसा बंद घराचे कुलूप तोडून सोन्या-चांदीसह रोकड लंपास केल्याने नागरिकांमध्ये संतापाची लाट उसळली आहे. मलठण येथील अष्टविनायक महामार्गालगत कॅनॉल रोडवरील रोहित्र मध्यरात्री फोडले. चोरट्यांनी रोहित्रातील तांब्याच्या तारांवर डल्ला मारला. याप्रकरणी महावितरणचे वरिष्ठ तंत्रज्ञ इंद्रजित दामोदर खरसाडे (रा. मलठण) यांनी शिरूर पोलीस ठाण्यात फिर्याद दाखल केली आहे. सोमवारी (दि. ९) मिडगुलवाडी येथील गावाला पाणीपुरवठा करणाऱ्या विहिरीवरील रोहित्र फोडले. त्याच दिवशी सविंदणे येथील डोंगर भागात कान्हूर मेसाई रस्त्यालगत असलेले रोहित्रही चोरट्यांनी लक्ष्य केले. दुसऱ्याच दिवशी कवठे येमाई येथील गणेशनगर परिसरातील वेल्डिंग केलेले रोहित्र फोडून त्यातील तांब्याच्या तारांची चोरी केली आहे. कवठे येमाई, सविंदणे, मलठण परिसरातील वीजपुरवठा विस्कळीत झाला आहे. कवठे येमाईत नागरिक धास्तावले कवठे येमाई येथे फत्तेश्वर मंदिराजवळील शरद सुनील गायकवाड यांच्या बंद घराचे भरदिवसा कुलूप तोडून चोरट्यांनी साडेतीन तोळे सोने, चांदीचे दागिने व साडेसहा हजार रोकड लंपास केली. ही घटना (दि.११) रोजी घडल्याची माहिती मिळाली आहे. घरातील लोक बाहेरगावी गेले असताना चोरट्यांनी ही संधी साधल्याचा प्राथमिक अंदाज आहे. घटनेची माहिती मिळताच पोलिसांनी घटनास्थळी भेट देऊन पाहणी केली असून पुढील तपास सुरू आहे. या घटनेमुळे परिसरात खळबळ उडाली आहे. पोलिसांनी नियमित रात्रगस्त वाढवावी, संशयितांवर लक्ष ठेवावे, चोरट्यांचा तातडीने बंदोबस्त करावा, अशी जोरदार मागणी केली आहे.
