Shirur News : शरदवाडी, जांबूत (ता. शिरूर) येथील लहानुबाई सखाराम सरोदे या ८५ वर्षीय वृद्धेच्या गळ्यातील सुमारे नऊ लाख रुपये किमतीचे साडेसहा तोळे सोन्याचे दागिने चोरून नेत पोबारा केल्याची घटना घडली आहे. या घटनेमुळे परिसरात भीतीचे वातावरण पसरले आहे. गेल्या दोन महिन्यातील ही याच परिसरातील दुसरी घटना असून भर दुपारी चोरी करून ऐवज चोरून नेणाऱ्या चोरट्यांचा तात्काळ बंदोबस्त करून त्यांना जेरबंद करण्याची मागणी उपसरपंच बाबाजो जोरी यांनी केली आहे. या घटनेची माहिती मिळताच टाकळी हाजी पोलीस दूरक्षेत्राचे पोलीस उपनिरीक्षक दिलीप पवार यांनी घटनास्थळी भेट देत पंचनामा केला. याबाबत मिळलेल्या अधिक माहितीनुसार, शुक्रवार (दि.२०) रोजी दुपारी वृद्ध महिला लहानुबाई सरोदे या दुपारी घरी एकट्याच होत्या. त्यांची मुले व सुना साखरपुडा कार्यक्रमासाठी गेले होते. या संधीचा फायदा घेत एका अनोळखी व्यक्तीने घरचे साखरपुडा कार्यक्रमाला गेले काय अशी विचारणा करत घरात पडलेल्या विळ्याने आजीच्या गळ्यातील सुमारे साडे सहा तोळे सोन्याचे दागिने घेऊन चोरट्याने पोबारा केला. याआधीच्या काळातही अशा प्रकारच्या अनेक छोट्या मोठ्या चोऱ्या या भागात झालेल्या असून दिवसेंदिवस अशा प्रकारच्या चोऱ्यांचे सत्र बेट भागात वाढत चालले आहे. या घटनांचे गांभीर्य लक्षात घेता पोलीस प्रशासनाने अशा गुन्हेगारांवर कारवाई करत त्यांना गजाआड करावे अशी मागणी परिसरातील ग्रामस्थांनी केली आहे.
