Bhandara Guardian Minister : भंडारा जिल्ह्याच्या राजकारणात मोठा भूकंप घडला आहे. संजय सावकारे यांची भंडारा जिल्ह्याच्या पालकमंत्रीपदावरून अचानक हकालपट्टी आणि पंकज भोयर यांची नवे पालकमंत्री म्हणून नियुक्ती यामुळे राजकीय वर्तुळात खळबळ उडाली आहे. सावकारेंच्या डिमोशनमागे नागरिकांचा रोष, शिंदे गटाचे आमदार नरेंद्र भोंडेकर यांची वाढती ताकद आणि आगामी निवडणुकीची रणनीती ही प्रमुख कारणे मानली जात आहेत. चला जाणून घेऊया.

पालकमंत्रीपदावरून हटवण्याचं नेमकं कारण काय?

संजय सावकारे यांच्या पालकमंत्रीपदावरून हटवण्यामागे भंडारा जिल्ह्यातील नागरिकांमधील तीव्र नाराजी हे प्रमुख कारण मानले जाते. सावकारे, जे जळगाव येथील रहिवासी आहेत, भंडारा जिल्ह्यात फारसे सक्रिय नव्हते. त्यांचा दौरा केवळ 15 ऑगस्ट, 26 जानेवारी किंवा जिल्हा नियोजनाच्या बैठकींपुरता मर्यादित होता. यामुळे नागरिकांच्या अनेक समस्या प्रलंबित राहिल्या होत्या. विशेषतः भंडाऱ्यातील पूरपरिस्थितीनंतरही सावकारे यांनी जिल्ह्याला भेट दिली नाही, ज्यामुळे नुकसानग्रस्त शेतकऱ्यांमध्ये प्रचंड रोष निर्माण झाला होता.

नागरिकांनी स्थानिक किंवा जवळच्या जिल्ह्यातील नेत्याला पालकमंत्रीपद देण्याची मागणी सातत्याने केली होती. सावकारे यांचा जिल्हा विकासासाठी ठोस निर्णय घेण्यात कमी पडलेला दृष्टिकोन आणि त्यांचा भंडाऱ्याशी असलेला तुटलेपणा यामुळे त्यांच्याविरोधात असंतोष वाढत होता. याशिवाय, शिंदे गटाचे आमदार नरेंद्र भोंडेकर यांची भंडाऱ्यातील वाढती ताकद भाजपसाठी चिंतेचा विषय ठरली होती. या सगळ्या पार्श्वभूमीवर सावकारेंना हटवण्याचा निर्णय घेण्यात आला.

पंकज भोयर यांच्यावर जबाबदारी

पंकज भोयर हे वर्धा जिल्ह्यातील असून गृहराज्यमंत्री आहेत, त्यांच्यावर आता भंडारा जिल्ह्याच्या पालकमंत्रीपदाची जबाबदारी सोपवण्यात आली आहे. भंडारा आणि वर्धा हे जवळचे जिल्हे असल्याने भोयर यांना स्थानिक समस्यांची चांगली जाण आहे, असे मानले जाते. आगामी नगरपालिका आणि स्थानिक स्वराज्य संस्थांच्या निवडणुकीच्या पार्श्वभूमीवर भाजपने भोयर यांच्यावर ही जबाबदारी सोपवून पक्षाची ताकद वाढवण्याचा प्रयत्न केला आहे. भोयर यांच्याकडून नागरिकांना विकासकामांना गती आणि प्रलंबित समस्यांवर त्वरित उपाययोजनांची अपेक्षा आहे.

भंडारा जिल्ह्यासाठी अनेक योजना राबवणार : पंकज भोयर

पंकज भोयर एका मराठी वृत्तवाहिनीशी बोलताना म्हणाले की, वरिष्ठ नेतृत्वाचे मी आभार व्यक्त करेल. मागील सहा ते सात महिन्यांपासून जे काम सुरू आहे त्याची दखल त्यांनी घेऊन माझी जबाबदारी वाढवलेली आहे. भंडारा जिल्ह्यासाठी अनेक योजना आहेत. ज्या वर्धा जिल्ह्यात पालकमंत्री म्हणून मी उपलब्ध करून दिल्या होत्या, त्याची अंमलबजावणी भंडारा जिल्ह्यात मुख्यमंत्री देवेंद्र फडणवीस यांच्या नेतृत्वात आम्ही करू, असे त्यांनी म्हटले आहे.