Shikrapur Crime – तळेगाव ढमढेरे (ता. शिरूर) येथे वायुदलातील एका माजी सैनिकाच्या जमिनीचा व्यवहार पूर्ण न करता त्यांना शिवीगाळ व दमदाटी करून जमीन नावावर करून देण्याचा तगादा लावत बळजबरीने जमिनीवर ताबा घेऊन अनधिकृत कंपाउंड व रस्ता करून प्लॉटिंग सुरू केल्याची घटना उघडकीस आली आहे. याप्रकरणी शिक्रापूर पोलिस ठाण्यात विजयकुमार बबनराव दरेकर याच्याविरुद्ध खंडणी वसुलीचा गुन्हा दाखल करण्यात आला आहे. तळेगाव ढमढेरे येथील वायुदलातील सेवानिवृत्त सैनिक हुमांषुकुमार प्रभुनाथ सिंग (वय 51, रा. वाघोली; मूळ रा. तक्कीपूर, ता. महाराजगंज, जि. सिवान, बिहार) यांची संबंधित जमीन आहे. काही काळापूर्वी त्यांनी ही जमीन विजयकुमार दरेकर याला विक्री करण्याचा व्यवहार केला होता. त्यावेळी दरेकर यांनी केवळ 50 हजार रुपये ऑनलाइन दिले, तर उर्वरित 14 लाख रुपयांचे दिलेले धनादेश वटले नाहीत. त्यामुळे सिंग यांनी न्यायालयात दावा दाखल केला होता. दरम्यान, विजयकुमार दरेकर याने वारंवार सिंग यांना जमीन नावावर करून देण्यासाठी दमदाटी केल्याचा आरोप करण्यात आला आहे. काही दिवसांपूर्वी सिंग हे त्यांच्या जमिनीकडे गेले असता तेथे असलेले तार कंपाउंड काढून टाकून भिंतीचे कंपाउंड व रस्ता तयार करण्यात आल्याचे तसेच जेसीबी व ट्रॅक्टरच्या सहाय्याने जमिनीतील माती काढून प्लॉटिंगचे काम सुरू असल्याचे त्यांच्या निदर्शनास आले. याबाबत सिंग यांनी दरेकर यांच्याकडे विचारणा केली असता, तुम्ही मला जमिनीच्या डेव्हलपमेंटचे अधिकार दिले आहेत, असे सांगण्यात आले. मात्र सिंग यांनी आपण असे कोणतेही अधिकार दिले नसल्याचे स्पष्ट केले असता दरेकर याने तू जमीन दिली नाही तरी मी बळजबरीने जमीन घेणार, अशी धमकी दिल्याचे फिर्यादीत नमूद करण्यात आले आहे. या घटनेप्रकरणी हुमांषुकुमार प्रभुनाथ सिंग यांनी दिलेल्या फिर्यादीवरून शिक्रापूर पोलिस ठाण्यात विजयकुमार बबनराव दरेकर (रा. सणसवाडी) याच्याविरुद्ध गुन्हा दाखल करण्यात आला असून पुढील तपास पोलीस उपनिरीक्षक वेरणनाथ मुत्तनवार करीत आहेत.
