Pune News : तळेगाव ढमढेरे येथे आज दुपारी सुमारे ३ वाजण्याच्या सुमारास अचानक जोरदार पावसाच्या (Pune News) सरी कोसळल्याने आठवडे बाजार परिसरात मोठ्या प्रमाणात पाणी साचले. अचानक आलेल्या पावसामुळे बाजारात खरेदी-विक्रीसाठी आलेले ग्राहक, व्यापारी आणि शेतकरी यांची मोठी धांदल उडाली.

आठवडे बाजारासाठी सकाळपासूनच विविध ठिकाणांहून (Pune News) व्यापारी व शेतकरी भाजीपाला, फळे, धान्य तसेच विविध प्रकारचा शेतीमाल विक्रीसाठी घेऊन आले होते. मात्र दुपारी अचानक पावसाचा जोर वाढल्याने बाजारातील परिस्थिती काही वेळातच बदलली.

बाजार परिसरात पाणी साचल्याने व्यापाऱ्यांनी आपला माल भिजू नये यासाठी प्लास्टिक, ताडपत्री तसेच उपलब्ध साहित्याचा आधार घेत माल सुरक्षित करण्याचा प्रयत्न केला. काही ठिकाणी साचलेल्या पाण्यामुळे विक्रीसाठी मांडलेला भाजीपाला व अन्य शेतीमाल पाण्याच्या संपर्कात आला. पाण्याचा प्रवाह वाढल्याने काही माल वाहून जाण्याची परिस्थिती निर्माण झाली. त्यामुळे व्यापाऱ्यांना आपला माल उचलून सुरक्षित ठिकाणी ठेवण्यासाठी मोठी धावपळ करावी लागली.

दरम्यान, पावसामुळे बाजारातील ग्राहकांचीही गैरसोय झाली. खरेदीसाठी आलेल्या नागरिकांना पाण्यातून वाट काढत मार्गक्रमण करावे लागले. काही ग्राहकांनी पावसाचा जोर कमी होईपर्यंत दुकाने व उपलब्ध आडोशाच्या ठिकाणी थांबणे पसंत केले. परिणामी काही काळ बाजारातील खरेदी-विक्रीचे व्यवहार मंदावले.

निचऱ्याचा प्रश्न ऐरणीवर
आठवडे बाजार परिसरात पावसाचे पाणी साचण्याची समस्या असून, पावसाच्या पाण्याचा योग्य निचरा होण्यासाठी आवश्यक उपाययोजना करण्याची मागणी व्यापारी व नागरिकांकडून होत आहे. बाजाराच्या दिवशी मोठ्या संख्येने नागरिक आणि व्यापारी (Pune News) एकत्र येत असल्याने पावसाळ्यात या परिसरात पाणी साचल्यास मोठी गैरसोय निर्माण होते.

बाजार परिसरातील पाण्याचा निचरा व्यवस्थित होण्यासाठी नाले, गटारे व पाणी वाहून जाणाऱ्या मार्गांची पाहणी करून आवश्यक ती कायमस्वरूपी उपाययोजना करावी, अशी अपेक्षा व्यापारी, शेतकरी आणि ग्राहकांकडून व्यक्त होत आहे.