Jamkhed case : जामखेडच्या खर्डा रस्त्यावर असलेल्या एका लॅाजमध्ये कला केंद्रात नर्तिका म्हणून काम करणाऱ्या एका महिलेचा मृत्यदेह आढळून आल्याने सर्वत्र मोठी खळबळ उडाली आहे. या महिलेने गळफास घेत आपल्या आयुष्याचा शेवट केला आहे. दिपाली पाटील (वय ३५) असे या महिलेचे नाव आहे. या प्रकरणात राजकीय नेत्याचे नाव समोर आले आहे. भाजपचा माजी नगरसेवक संदीप गायकवाड याने लग्नसाठी तगादा लावल्याने या त्रासाला कंटाळून दिपालीने आत्महत्या केल्याची प्राथमिक माहिती समोर आली असून, या प्रकरणाचा तपास पोलीस करत आहेत. या प्रकरणात आणखी धक्कादायक माहिती समोर येण्याची शक्यता वर्तवण्यात आली आहे. याप्रकरणी पोलिसांनी संदीप गायकवाड याच्याविरोधात आत्महत्येस प्रवृत्त केल्याचा गुन्हा दाखल केला असून त्याला अटकही करण्यात आली आहे. त्यामुळे त्याच्या चौकशीत पोलिसांना कोणती माहिती मिळते याकडे सर्वांचे लक्ष लागलेले आहे. या धक्कादायक घटनेबाबत कर्जत जामखेडचे आमदार रोहित पवार यांनी एक्सवरून ट्वीट केले होते. गुन्हा दाखल झाल्यानंतरही त्यांनी ट्वीट केले आहे. या ट्वीटमध्ये त्यांनी महिलेला न्याय मिळण्याची मागणी केली आहे. रोहित पवार ट्वीटमध्ये काय म्हणाले? अखेर आत्महत्येस प्रवृत्त केल्याप्रकरणी जामखेड पोलीस ठाण्यात संदीप गायकवाड याच्याविरोधात गुन्हा दाखल करण्यात आला. हा तोच आरोपी आहे ज्याच्या पत्नीला भाजपने नगरसेवक पदाची उमेदवारी दिली आहे. स्वतःचं लग्न झालं असतानाही एका नर्तिकेवर लग्न करण्यासाठी दबाव आणल्यामुळं तिच्यावर आत्महत्या करण्याची वेळ या आरोपीमुळे आली. या घटनेमुळे भाजपचा खरा चेहरा पुढं आला आणि असे अनेक नमुने आहेत ज्यांना भाजपने नगरपरिषद निवडणुकीत उमेदवारी दिली.. हिच आहे #party_with_difference भाजपा. कोण आहे संदीप गायकवाड? महिलेच्या आत्महत्या प्रकरणात गुन्हा दाखल करण्यात आलेला आरोपी संदीप गायकवाड हा भाजपचा माजी नगरसेवक असल्याची माहिती समोर आली आहे. नगरपरिषद निवडणुकीसाठी त्याने प्रभाग क्रमांक पाचमधून भाजपच्या तिकीटावर निवडणूक लढवली होती. नेमकं काय घडलं? दिपाली पाटील हे मूळची कल्याण येथील रहिवासी होती. ती आपल्या मैत्रिणींसोबत जामखेडमधील तपनेश्वर भागात राहत होती. गुरुवारी सकाळी बाजारात जाऊन येते असे सांगून ती घराबाहेर पडली ती परतलीच नाही. यामुळे मैत्रिणींनी शोधाशोध करण्यास सुरुवात केली. त्यानंतर ज्या रिक्षातून दिपालीने प्रवास केला. त्याच्याकडे चौकशी केली असता त्याने तिला साई लॅाज येथे सोडण्याचे सांगितले. लॅाजमध्ये मैत्रिंणी पोहचल्या अन्…. दिपालीच्या मैत्रिंणीला तिचे असे अचानक गायब होणे धक्कादायक वाटले. ज्या लॅाजची माहिती तिला मिळाली. तिथे त्या गेल्या आणि जे काही समोर दिसले ते पाहून त्यांना मोठा धक्काच बसला. संबंधित लॉजमध्ये मैंत्रिणी पोहोचल्या असता रुम आतून लॉक होती. त्यानंतर डुप्लिकेट चावीने दरवाजा उघडला आणि समोर पंख्याला गळफास घेतलेला मृतदेह आढळला. पोलिसांनी मृतदेह ताब्यात घेतला असून, पुढील चौकशी पोलीस करत आहेत. न्यायालयात नेमकं काय घडलं ? पोलिसांनी संदीप गायकवाडला शुक्रवारी रात्री उशिरा अटक केली होती. आज त्याला न्यायालयात हजर करण्यात आले. सरकारी पक्षातर्फे युक्तिवाद करताना, आरोपीने दीपालीला आत्महत्येस कशा प्रकारे प्रवृत्त केले? यामागे आणखी काही कारणे आहेत का? आणि घटनेच्या वेळी संदीप गायकवाडचे लोकेशन काय होते? या सर्व बाबींचा सखोल तपास करण्यासाठी पोलीस कोठडीची मागणी करण्यात आली. न्यायालयाने ही मागणी मान्य करत गायकवाडला ४ दिवसांची पोलीस कोठडी सुनावली आहे. हेही वाचा : “जर महायुती झाली नाही तर आम्ही…”; मुंबई महापौरबाबत शिदेंच्या शिलेदाराचं मोठं विधान; लोढांच्या ‘त्या’ वक्तव्यावर थेट भाष्य
