Satwik Chirag Title : सात्विक-चिरागचने रचला इतिहास! चिनी जोडीला घरात घुसून धूळ चारत चायना मास्टर्सचे पटकावले जेतेपद
Satwik Chirag Title : सात्विक-चिराग जोडीने चीनच्या जोडीला त्यांच्याच देशात लोळवत चायना मास्टर्स टायटलवर नाव कोरलं.
Satwik Chirag Win China Masters 2026 Title Beats He Jiting Ren Xiangyu 10th World Tour : भारताची स्टार बॅडमिंटन जोडी सात्विकसाईराज रंकीरेड्डी आणि चिराग शेट्टी (Satwik-Chirag) यांनी पुन्हा एकदा जागतिक स्तरावर भारताचा तिरंगा डौलाने फडकावला आहे. रविवारी रंगलेल्या चायना मास्टर्स २०२६ (China Masters 2026) च्या अत्यंत थरारक अंतिम फेरीत भारतीय जोडीने यजमान चीनच्या ही जिटिंग आणि रेन शियांगयु या जोडीचा ११-२१, २१-१३, २१-१७ असा पराभव केला. या विजयासह सात्विक-चिरागने कारकिर्दीतील १० वे बीडब्ल्यूएफ वर्ल्ड टूर जेतेपद पटकावत चीनी जोडीविरुद्ध आपला हेड-टू-हेड रेकॉर्ड ३-० असा निर्विवाद राखला.
पहिल्या गेममध्ये बॅकफूटवर; चीनी जोडीने अवघ्या १८ मिनिटांत उडवला धुव्वा –
अंतिम लढतीच्या सुरुवातीला स्थानिक प्रेक्षकांच्या पाठिंब्यावर चीनी जोडीने आक्रमक खेळ करत थेट ५-० अशी मोठी आघाडी घेतली. नेटवरील वेगवान हालचाली आणि अचूक स्मॅशमुळे भारतीय जोडीला लय सापडत नव्हती. मध्यांतरापर्यंत ११-५ अशी आघाडी घेतल्यानंतर चीनी खेळाडूंनी भारतीय जोडीला पुनरागमनाची कोणतीही संधी दिली नाही. अवघ्या १८ मिनिटांच्या खेळात चिनी जोडीने पहिला गेम २१-११ असा एकतर्फी जिंकून सात्विक-चिरागवर प्रचंड दबाव निर्माण केला.
रणनीती बदलली अन् गेम फिरवला; दुसऱ्या गेममध्ये चिरागचा पॉवरफुल खेळ!
WATCH SATWIK & CHIRAG WINNING THE CHINA MASTERS 2026 TITLE! 🏆🤩
– Second BWF Super 750 Title for duo! 🇮🇳
BEAT CHINA AT HOME IN THE FINAL! 🔥🔥🔥 pic.twitter.com/ZCEdec0mLR https://t.co/CWOqWu1y7f
— The Khel India (@TheKhelIndia) September 6, 2026
पहिला गेम गमावल्यानंतर सात्विक आणि चिरागने खेळाची दिशा बदलली. सुरुवातीच्या बरोबरीनंतर भारतीय जोडीने खेळावर पूर्ण नियंत्रण मिळवत मध्यंतराला ११-७ अशी आघाडी घेतली. चिराग शेट्टीचे शक्तिशाली स्मॅश आणि सात्विकचा भक्कम बॅककोर्ट डिफेन्स यापुढे चीनी खेळाडू निष्प्रभ ठरले. भारतीय जोडीने आक्रमक धोरण कायम ठेवत हा गेम २१-१३ असा खिशात घालत सामन्यात १-१ अशी बरोबरी साधली.
निर्णायक गेममध्ये रोमहर्षक थरार; १७-१७ नंतर सात्विक-चिरागने मारली बाजी –
INDIA’S FIRST CHINA MASTERS CHAMPIONS! 🥇🇮🇳
Satwik & Chirag fight back brilliantly to defeat He Jiting & Ren Xiangyu 11–21, 21–13, 21–17 and make history in China! 🏸🔥#ChinaMasters #SatwikChirag #IndianBadminton #RelianceFoundation pic.twitter.com/uNccJlRPrw
— RelianceFoundationSports (@RFYouthSports) September 6, 2026
तिसऱ्या आणि निर्णायक गेममध्ये श्वास रोखून धरणारी चुरस पाहायला मिळाली. सुरुवातीला ०-४ ने पिछाडीवर पडल्यानंतर भारती खेळाडूंनी ७-७ अशी बरोबरी साधली आणि ब्रेकपर्यंत ११-९ अशी आघाडी घेतली. सामन्याच्या अखेरीस स्कोअर १६-१६ आणि नंतर १७-१७ असा बरोबरीत आला. मात्र, या मोक्याच्या क्षणी सात्विक-चिरागने अनुभवाचा वापर करत सलग ४ गुण जिंकले आणि २१-१७ ने गेम जिंकत चायना मास्टर्सच्या सुवर्ण चषकावर आपले नाव कोरले.
