Satara Road Accident – वाठार ते भाडळे मार्गावर विखळे (ता. कोरेगाव) गावच्या हद्दीत रुबाब हॉटेल जवळ अज्ञात वाहनाने मोटारसायकलला धडक दिल्याने झालेल्या अपघातात 35 वर्षीय युवकाचा मृत्यू झाला. हा अपघात गुरुवारी (दि. 10 सप्टेंबर) रात्री साडेसातच्या सुमारास घडला. अपघातानंतर अज्ञात वाहनचालक घटनास्थळावरून पसार झाला.

मयूर वसंत फडतरे (वय 35, रा. फडतरवाडी (नेर), ता. खटाव, जि. सातारा) असे मृत युवकाचे नाव आहे. याबाबत पोलिसांनी दिलेल्या माहितीनुसार, गुरूवार दि.10 रोजी मयूर फडतरे हा सोळशी येथे दर्शन घेऊन मोटारसायकल (क्र. एम एच 11 बीएस 2296) वरून फडतरवाडी नेर येथे निघाला होता. सायंकाळी साडेसातच्या सुमारास वाठार तो भाडळे मार्गावर विखळे गावच्या हद्दीत रुबाब हॉटेल जवळ आला असताना अज्ञात वाहनाने मयूरच्या मोटारसायकलला जोरदार धडक दिली.

या अपघातात मयूर याच्या डोक्याच्या पाठीमागील बाजूस गंभीर दुखापत झाल्याने नाक, कान व तोंडातून रक्तस्राव झाला व हातापायांनाही दुखापत झाली. सदर अपघाताची माहिती मिळताच वाठार पोलिसांनी गंभीर जखमी असलेल्या मयूरला 108 रुग्णवाहिकेने पिंपोडे बुद्रुक येथील ग्रामीण रुग्णालयात उपचारासाठी दाखल केले.

मात्र, वैद्यकीय अधिकार्‍यांनी त्यांचा मृत्यू झाल्याचे सांगितले. याबाबत जगन्नाथ नारायण फडतरे (वय 48, रा. फडतरवाडी (नेर), ता. खटाव) यांनी अज्ञात वाहन चालका विरोधात वाठार पोलीस ठाण्यात फिर्याद दिली असून पोलीस हवालदार अमोल कर्णे तपास करत आहेत.