Satara Municipal Council – शहरातील एकल महिलांची सामाजिक, आर्थिक आणि शासकीय योजनांशी संबंधित माहिती अद्ययावत करण्यासाठी सातारा नगरपालिकेने विशेष सर्वेक्षण हाती घेतले आहे. शहरातील एकही पात्र एकल महिला शासकीय योजनांच्या लाभापासून वंचित राहू नये, यासाठी हे सर्वेक्षण महत्त्वाचे ठरणार आहे. संबंधित महिलांनी १५ सप्टेंबरपूर्वी आवश्यक माहिती उपलब्ध करून द्यावी, असे आवाहन नगरपालिका प्रशासनाने केले आहे.

या सर्वेक्षणामध्ये एकल महिलांची आवश्यक वैयक्तिक माहिती, त्यांची सामाजिक व आर्थिक परिस्थिती, सध्या कोणत्या शासकीय योजनांचा लाभ घेतला जात आहे किंवा कोणत्या योजनांपासून त्या वंचित आहेत, याची नोंद केली जाणार आहे. त्यानुसार पात्र महिलांना उपलब्ध शासकीय कल्याणकारी योजनांचा लाभ मिळवून देण्यासाठी प्रशासनाला पुढील कार्यवाही करणे शक्य होणार आहे.

शहरातील अनेक पात्र महिला विविध कारणांमुळे शासकीय योजनांपासून दूर राहतात. अशा महिलांची माहिती एकत्रित उपलब्ध झाल्यास त्यांना आवश्यक मार्गदर्शन करुन संबंधित विभागांशी समन्वय साधता येणार आहे. तसेच एकल महिलांच्या गरजा लक्षात घेऊन भविष्यातील सामाजिक व आर्थिक सक्षमीकरणाच्या उपक्रमांचे नियोजन करण्यासही मदत होईल.

या सर्वेक्षणासाठी नगरपालिकेच्या शहर अभियान व्यवस्थापन कक्षामार्फत माहिती संकलित केली जात आहे. सर्वेक्षणासंदर्भात अधिक माहिती अथवा मार्गदर्शनासाठी कीर्ती साळुंखे, गीतांजली यादव आणि आरती जोशी यांच्याशी कार्यालयीन वेळेत संपर्क साधता येईल. आपल्या परिसरातील पात्र एकल महिलांची माहिती नगरपालिकेच्या सर्वेक्षण कर्मचाऱ्यांपर्यंत पोहोचवावी, असेही प्रशासनाने स्पष्ट केले आहे. शहरातील एकही पात्र महिला सर्वेक्षणातून वंचित राहू नये, यासाठी नागरिकांनीही सहकार्य करावे, असे आवाहन करण्यात आले आहे.