Saswad Police – पुरंदर तालुक्यातील वनपुरी व झेंडेवाडी परिसरातील जुगार अड्ड्यांवर सासवड पोलिसांनी धडक कारवाई करत १८ जणांविरुद्ध गुन्हे दाखल केले. दोन स्वतंत्र छाप्यांमध्ये एकूण ४ लाख ८५ हजार २५० रुपयांची रोख रक्कम आणि मुद्देमाल जप्त करण्यात आला असून महाराष्ट्र जुगार प्रतिबंध अधिनियमांतर्गत कारवाई करण्यात आली आहे. सासवडचे पोलीस निरीक्षक संतोष घोळवे यांना मिळालेल्या गोपनीय माहितीआधारे,

वनपुरी येथील शंभूराजे चौक परिसरातील एका पत्र्याच्या शेडमध्ये जुगार अड्ड्यावर पोलीस उपनिरीक्षक अशोक जाधव यांच्या मार्गदर्शनाखाली पथकाने छापा टाकला. या कारवाईत गणेश बबन कुंभारकर (जुगार अड्डा चालक) याच्यासह सहा जण जुगार खेळताना आढळून आले. पोलिसांनी २१ हजार ८७० रुपये रोख रक्कम व इतर मुद्देमाल जप्त केला. याप्रकरणी सासवड पोलीस ठाण्यात महाराष्ट्र जुगार प्रतिबंध अधिनियम कलम ४, ५ व ६ अंतर्गत गुन्हा दाखल करण्यात आला असून पुढील तपास पोलीस हवालदार लाटणे करीत आहेत.

दुसऱ्या कारवाईत झेंडेवाडी येथील हॉटेल स्टे एन्जॉय येथे जुगार सुरू असल्याची माहिती मिळाल्यानंतर पोलीस उपनिरीक्षक श्रीराम पालवे यांच्या मार्गदर्शनाखाली पथकाने छापा टाकला. यावेळी सुनिल प्रेम थारू (जुगार अड्डा चालक) याच्यासह १२ जण जुगार खेळताना आढळून आले. या छाप्यात ४ लाख ६३ हजार ३८० रुपये रोख रक्कम व मुद्देमाल जप्त करण्यात आला. याप्रकरणी महाराष्ट्र जुगार प्रतिबंध अधिनियम कलम ४, ५ व ६ अंतर्गत गुन्हा दाखल करण्यात आला असून पुढील तपास पोलीस उपनिरीक्षक गोडसे करीत आहेत.