Sant Tukaram Maharaj Palkhi – जगद्गुरु श्री तुकाराम महाराज पालखी सोहळ्याचे वडापुरी (ता. इंदापूर) येथे आज भक्तीमय वातावरणात आणि उत्साहात स्वागत करण्यात आले. इंदापूर येथील मुक्काम आटोपून पालखी वडापुरीकडे मार्गस्थ झाली होती. या वेळी दर्शनासाठी हजारो वारकरी व भाविकांनी मोठी गर्दी केली होती. संपूर्ण परिसर ‘ज्ञानोबा-तुकाराम’च्या जयघोषाने दुमदुमून गेला होता.

इंदापूर येथून पालखी निघाल्यानंतर विठ्ठलवाडी तसेच वडापुरी येथील भजनी मंडळ आणि ग्रामस्थांनी पालखीचे पारंपरिक पद्धतीने स्वागत केले. टाळ-मृदुंगाचा गजर आणि अभंग-भजनांच्या सुरावटीमुळे संपूर्ण परिसर भक्तीरसात न्हाऊन निघाला. पालखीच्या दर्शनासाठी काटी, रेडा, रेडणी, शेटफळ हवेली, पंधारवाडी, अवसरी, बेडसिंग, बाभूळगाव, भाटनिमगाव आणि विठ्ठलवाडी परिसरातातून हजारो भाविक आले होते.

या वेळी पोलीस निरीक्षक विलास नाळे, निरा-भिमा कारखान्याचे माजी संचालक दत्तात्रय शिर्के, इंदापूर अर्बन बँकेचे माजी चेअरमन निवृत्ती थोरात, पंचायत समिती सदस्या अर्चना खबाले, अमोल चंदनशिवे, ग्रामपंचायत अधिकारी डी. बी. वाघ, ग्राम महसूल अधिकारी धनाजी भोसले, ग्रामपंचायत अधिकारी नंदराज चंदनशिवे, दादा तोबरे, महेश देशमुख, ग्रामस्थ हजारो भाविक उपस्थित होते.

प्रशासकीय नियोजनामुळे दर्शन सुलभ
श्रीनाथ मंदिराच्या मैदानावर असलेल्या पालखी विसावा स्थळावर मोठी गर्दी होणार हे लक्षात घेऊन ग्रामपंचायत, महसूल आणि पोलीस प्रशासनाने चोख नियोजन केले होते. भाविकांना दर्शनासाठी कोणतीही अडचण येऊ नये म्हणून स्वतंत्र प्रवेश व निर्गमन मार्ग, वाहतूक नियंत्रण, पिण्याच्या पाण्याची सुविधा तसेच कडक सुरक्षा व्यवस्था तैनात करण्यात आली होती. प्रशासकीय दक्षता आणि ग्रामस्थांच्या सक्रिय सहकार्यामुळे पालखी सोहळा अत्यंत शांततेत व शिस्तबद्ध पद्धतीने पार पडला.