आटपाडी (सांगली) : सांगली जिल्ह्यातील आटपाडी तालुक्यातील करगणी गावात दहावीत शिकणाऱ्या 16 वर्षीय मुलीच्या आत्महत्या प्रकरणाने एकच खळबळ माजली आहे. या प्रकरणात राजकीय हस्तक्षेप आणि पोलिसांवर दबाव असल्याचे आरोप होत असताना, एका ऑडिओ क्लिपने नव्या वादाला तोंड फोडले आहे. यामध्ये आरोपींना सोडण्यासाठी पोलिसांच्या नावाने पैशाची मागणी झाल्याचा दावा आहे. सांगलीचे पोलीस अधीक्षक संदीप घुगे यांनी याची सखोल चौकशीचे आदेश दिले असून, पोलिसांनी कोणताही राजकीय दबाव नसल्याचे स्पष्ट केले आहे. नेमकं प्रकरण काय? करगणी गावात एका अल्पवयीन मुलीने राहत्या घरात गळफास घेऊन आत्महत्या केल्याची घटना 7 जुलै 2025 रोजी घडली. तिच्या वडिलांनी दाखल केलेल्या तक्रारीनुसार, चार तरुणांनी तिचा लैंगिक छळ केला आणि व्हिडीओ व्हायरल करण्याची धमकी दिली. यामुळे तिने टोकाचे पाऊल उचलले. या प्रकरणी राजू गेंड, रामदास गायकवाड, अनिल काळे आणि रोहित खरात या चार तरुणांविरुद्ध गुन्हा दाखल झाला आहे. यापैकी गेंड, काळे आणि खरात यांना अटक झाली आहे, तर गायकवाड रुग्णालयातून बरे झाल्यावर अटक होणार आहे. पोलिसांनी आरोपींचे मोबाइल आणि डीव्हीआर जप्त केले असून, ते न्याय वैज्ञानिक प्रयोगशाळेत तपासणीसाठी पाठवले आहेत. राजकीय हस्तक्षेपाचे आरोप या प्रकरणात भाजप आमदार गोपीचंद पडळकर आणि माजी सभापती ब्रह्मानंद पडळकर तसेच आमदार सुहास बाबर यांच्यावर परस्पर हस्तक्षेपाचे आरोप झाले. शिंदे गटाने पडळकर यांचे कॉल रेकॉर्ड तपासण्याची मागणी केली, तर भाजपने बाबर यांच्यावर दबाव टाकल्याचा दावा केला. यामुळे तपासात उशीर झाल्याचा संशय व्यक्त होत आहे. दरम्यान, एका ऑडिओ क्लिपमुळे वाद वाढला, ज्यात पोलिसांच्या नावाने आरोपींना सोडण्यासाठी पैशाची मागणी झाल्याचे समोर आले. सांगलीचे एसपी संदीप घुगे यांनी याची चौकशी सुरू केली आहे.
