Pune : ए बी कला भाव आर्ट फाउंडेशनतर्फे कोथरूड येथील ऋत्विक सभागृहात आयोजित राष्ट्रीय नृत्य स्पर्धेत रिदम डान्स इन्स्टिट्यूटच्या विद्यार्थिनींनी उल्लेखनीय यश मिळवले. सब-ज्युनिअर सेमी-क्लासिकल कथ्थक प्रकारात सान्वी चांगडे आणि श्रीनिका देशपांडे यांनी द्वितीय क्रमांक पटकावला. त्यांना ट्रॉफी, मेडल आणि प्रमाणपत्र देऊन गौरविण्यात आले.

या राष्ट्रीय स्पर्धेत पुणे, नाशिक, मुंबई, हैदराबाद, बंगळुरू आणि दिल्ली येथील स्पर्धकांनी सहभाग घेतला होता. विविध शहरांतील स्पर्धकांमध्ये उत्कृष्ट सादरीकरण करत सान्वी आणि श्रीनिकाने राष्ट्रीय स्तरावर दुसरा क्रमांक मिळवला.

रिदम डान्स इन्स्टिट्यूटच्या संचालिका आणि नृत्य प्रशिक्षिका गंधाली होशिंग खिस्ते यांच्या मार्गदर्शनाखाली विद्यार्थिनींनी हे यश मिळवले. त्यांच्या मेहनतीसोबतच सातत्यपूर्ण सराव, जिद्द आणि योग्य मार्गदर्शनाचा या यशात महत्त्वाचा वाटा आहे.

विद्यार्थिनींच्या प्रत्येक सादरीकरणामागे नियमित सराव आणि मेहनत होती. विद्यार्थिनी आणि शिक्षिका यांच्या एकत्रित प्रयत्नांना राष्ट्रीय स्तरावर मिळालेले हे यश संस्थेसाठी अभिमानाची बाब ठरली आहे.