बेल्हे : रक्षाबंधन सणाचे औचित्य साधून जिल्हा परिषद प्राथमिक शाळा इंदिरानगर, बेल्हे (ता. जुन्नर) येथील विद्यार्थ्यांनी बेल्हे परिसरातील भारतीय आजी-माजी सैनिकांसाठी स्वतः राख्या तयार करून पाठविल्या. सीमेवर देशाचे रक्षण करणार्‍या जवानांप्रती प्रेम, आदर आणि कृतज्ञता व्यक्त करण्यासाठी विद्यार्थ्यांनी राबविलेल्या या उपक्रमाचे सर्वत्र कौतुक होत आहे.

विद्यार्थ्यांनी स्वतः तयार केलेल्या राख्या सैनिकांपर्यंत कशा पोहोचविल्या जातात, याबाबतही त्यांनी टपाल कार्यालयातील अधिकार्‍यांकडून माहिती जाणून घेतली. राखी तयार करण्यापासून ती सैनिकांपर्यंत पाठविण्यापर्यंतच्या प्रक्रियेची माहिती मिळाल्याने विद्यार्थ्यांमध्ये उत्सुकता निर्माण झाली. देशाच्या सीमेवर कर्तव्य बजावताना अनेक सैनिक सण-उत्सवांपासून दूर असतात. अशा सैनिकांना रक्षाबंधनाच्या निमित्ताने आपुलकीची जाणीव करून देण्याचा प्रयत्न या उपक्रमातून करण्यात आला.

सैनिकांप्रती प्रेम व जिव्हाळा वाढावा, तसेच विद्यार्थ्यांच्या मनात देशाबद्दल प्रेम, अभिमान आणि राष्ट्रभक्तीची भावना निर्माण व्हावी, हा या उपक्रमामागील प्रमुख उद्देश असल्याचे शाळेच्या वतीने सांगण्यात आले. या उपक्रमाचे पंचायत समिती सदस्य राजेंद्र पिंगट, सरपंच मनिषा डावखर, कैलास आरोटे, अनन्या तपासे, उपसरपंच पापाभाई कुरेशी, नवनाथ शिरतर तसेच ग्रामपंचायत सदस्य प्रदीप पिंगट, रितेश देशमुख, गौरी पिंगट, नारायण पवार, गणेश पिंगट, संदेश पिंगट, अकिल शेख, प्रतिक वाघचौरे, अल्पेश सोनवणे, कोमल पिंगट, सुनंदा बिचारे, पवित्रा सोनवणे यांनी कौतुक केले.

मुख्याध्यापक अनिल कुटे, उपशिक्षिका सुरेखा कुटे यांनी विद्यार्थ्यांना या उपक्रमासाठी मार्गदर्शन केले. विद्यार्थ्यांच्या हातून सैनिकांपर्यंत पोहोचणारी प्रत्येक राखी ही केवळ धाग्याची नसून देशप्रेम, आदर आणि कृतज्ञतेची भावना घेऊन जाणारी आहे, अशी भावना यावेळी व्यक्त करण्यात आली.