Political News : विधानसभा निवडणुकीच्या रणधुमाळीनंतर महाविकास आघाडीमधील गळती थांबण्याचे (Political News) नाव घेत नाहीये. महायुतीकडून विरोधी पक्षांना एकापाठोपाठ एक राजकीय हादरे दिले जात असतानाच, आता भाजपने थेट काँग्रेसच्या बालेकिल्ल्यात सुरुंग लावला आहे.

बुलढाणा जिल्ह्यासह चिखली विधानसभा मतदारसंघातील काँग्रेसचा अत्यंत महत्त्वाचा आणि वजनदार चेहरा मानले जाणारे माजी आमदार तथा काँग्रेसचे माजी जिल्हाध्यक्ष राहुल बोंद्रे यांनी भाजपमध्ये प्रवेश करण्याचा निर्णय घेतला आहे. हा राजकीय (Political News) भूकंप काँग्रेस पक्षासह प्रदेश नेतृत्वासाठी अत्यंत मोठा धक्का मानला जात आहे.

राहुल बोंद्रे यांनी स्वतः आपल्या अधिकृत फेसबुक पोस्टद्वारे या राजकीय भूकंपाची माहिती दिली आहे. या पोस्टमध्ये त्यांनी अत्यंत भावनिक शब्दांत आपल्या राजकीय प्रवासाचा आढावा घेतला. काँग्रेस पक्षाने आपल्याला अनेक संधी, महत्त्वाची पदे आणि जिवाभावाची माणसे दिली, अशा भावना व्यक्त करत त्यांनी पक्षासोबतच्या प्रदीर्घ आठवणींना उजाळा दिला.

ज्येष्ठ नेते मुकुल वासनिक यांनी आपल्या राजकीय प्रवासाची सुरुवात करून दिली आणि कायम मार्गदर्शन केले, तर हर्षवर्धन सपकाळ यांनी सख्ख्या भावाप्रमाणे प्रेम दिले, याचाही त्यांनी आवर्जून उल्लेख केला. जुन्या सहकाऱ्यांना आपण कधीही विसरणार नाही, असे नमूद करतानाच नव्या राजकीय वळणावर आपण भाजपसोबत जाण्याचा पक्का निर्णय घेतल्याचे बोंद्रे यांनी स्पष्ट केले.

विधानसभा निवडणुकीनंतर महाविकास आघाडीला (Political News) एकापाठोपाठ एक पराभवाचे धक्के पचवावे लागत असताना, नेत्यांच्या पक्षांतरामुळे आघाडीची ताकद आणखी क्षीण होताना दिसत आहे.

ठाकरे गटाच्या खासदारांनी शिंदे गटात केलेल्या प्रवेशानंतर आणि शरद पवार गटातील काही महत्त्वाच्या नेत्यांच्या पक्षांतरानंतर, आता काँग्रेसला थेट बुलढाण्यात खिंडार पडल्याने महाविकास आघाडीतील अस्वस्थता शिगेला पोहोचली आहे. राहुल बोंद्रे यांच्या या भाजपप्रवेशामुळे चिखली आणि बुलढाणा जिल्ह्यातील राजकीय समीकरणे पूर्णपणे बदलणार आहेत.