Jitendra Singh : कॉक्रोच जनता पार्टीच्या (सीजेपी) नेत्यांना परदेशांतून पैसा मिळत असल्याचा आरोप केंद्रीय मंत्री जितेंद्र सिंह (Jitendra Singh) यांनी केला. त्यावरून सीजेपीच्या नेत्यांनी पलटवार केला. तसेच, याआधी आमच्याशी वाटाघाटी का केल्या, असा सवाल सिंह यांना उद्देशून केला.

सीजेपीचा संस्थापक अभिजीत दिपके याला अमेरिकेतून, तर त्या संघटनेचा नेता आशुतोष रांका याला पाकिस्तानमधून पैसा उपलब्ध होतो, असा आरोपवजा दावा सिंह (Jitendra Singh) यांनी नुकताच केला. तो फेटाळत दिपके, रांका आणि सीजेपीचा आणखी एक नेता सौरव दास यांनी मिश्‍कील शैलीत प्रतिक्रिया दिल्या.

सीजेपीने प्रथम नीट पेपरफुटीविरोधात आंदोलन केले. त्यावेळी केंद्र सरकारच्या वतीने सिंह आणि जे.पी.नड्डा या मंत्र्यांनी सीजेपीशी वाटाघाटी केल्या. त्याची आठवणही सीजेपीच्या नेत्यांनी करून दिली.

सिंह यांनी आरोप करताना दिपके आणि रांका यांचा उल्लेख केला. मात्र, सीजेपीचा तिसरा महत्वाचा नेता असणाऱ्या दास याचा उल्लेख केला नाही. त्याकडे लक्ष वेधून दिपके याने दासला कुठून पैसा मिळतो, अशा आशयाचा उपरोधिक सवाल सोशल मीडियावरून केला. दिपकेची पोस्ट टॅग करत दास यानेही तिरकस शैलीतील टिप्पणी केली.

दास याने त्याच्या नावाचा उल्लेख न केल्याबद्दल सिंह (Jitendra Singh) यांचे आभार मानले. रांका याने त्याच्यावरील आरोपाचा समाचार प्रश्‍न आणि उत्तरांच्या स्वरूपात घेतला. पेपर कोणी फोडले? पाकिस्तान. शाळा कोणी उद्धवस्त केल्या? पाकिस्तान. मतचोरी कोणी घडवली? पाकिस्तान. देशात बेरोजगारी कोणी निर्माण केली? पाकिस्तान, अशा आशयाची पोस्ट त्याने प्रसिद्ध केली.