Rahmanullah Gurbaz Injury Video Viral : क्रिकेटच्या मैदानावर अपघाताच्या अनेक घटना आपण पाहिल्या आहेत, मात्र गुरुवारी (२२ जानेवारी) रात्री वेस्ट इंडिज आणि अफगाणिस्तान यांच्यातील तिसऱ्या टी-२० सामन्यात एक भयानक दृश्य पाहायला मिळाले. अफगाणिस्तानचा स्टार सलामीवीर रहमनुल्लाह गुरबाजच्या मानेला गुडाकेश मोतीने थ्रो केलेला चेंडू लागल्याने तो खेळपट्टीवरच वेदनेने तडफडू लागला. या घटनेमुळे काही काळ चाहत्यांच्या काळजाचा ठोका चुकला होता. ज्याचा व्हिडीओ व्हायरल होत आहे.

नेमकं काय घडलं?

अफगाणिस्तानच्या डावातील १५ व्या षटकादरम्यान ही घटना घडली. गुरबाज नॉन-स्ट्राईकर एंडला होता. धाव घेण्याच्या प्रयत्नात असताना तो पुन्हा क्रिजमध्ये परतत होता, त्याच वेळी वेस्ट इंडिजच्या क्षेत्ररक्षक गुडाकेश मोतीने फेकलेला चेंडू थेट गुरबाजच्या मानेवर (उघड्या भागावर) जाऊन लागला. चेंडू इतक्या वेगाने होता की लागताच गुरबाजचा हेल्मेट खाली पडले आणि तो जमिनीवर कोसळून वेदनेने विव्हळू लागला.

वेदनेनंतरही मैदानावर झुंज –

🚨 SCARY SCENE FOR CRICKET FANS 🚨

Rahmanullah Gurbaz gets hit by ball, collapses on ground in 3rd T20I against West Indies pic.twitter.com/q8n7k5REIi

— Jeet (@JeetN25) January 23, 2026

अंपायर्सनी तातडीने फिजिओला पाचारण केले आणि बराच वेळ खेळ थांबवण्यात आला. सुदैवाने, ही दुखापत जीवघेणी ठरली नाही. काही वेळानंतर गुरबाज पुन्हा उभा राहिला आणि त्याने फलंदाजी सुरू ठेवली. त्याने ५८ चेंडूत ७१ धावांची झुंजार खेळी केली. गुरबाज आणि इब्राहिम झाद्रानने संघाला चांगली सुरुवात करून दिली, मात्र मधली फळी पत्त्याच्या बंगल्यासारखी कोसळल्याने अफगाणिस्तानला १५२ धावांचे लक्ष्य गाठता आले नाही. अफगाणिस्तानचा डाव १३६ धावांवर मर्यादित राहिला आणि त्यांना हा सामना गमवावा लागला.

हेही वाचा – Prashant Veer Injury : चेन्नई सुपर किंग्सचं आयपीएलपूर्वी टेन्शन वाढलं! १४ कोटींच्या स्टार खेळाडूला गंभीर दुखापत

वर्ल्ड कपसाठी चिंतेचे ढग –

अफगाणिस्तानने हा सामना गमावला असला तरी, त्यांनी ही टी-२० मालिका २-१ अशा फरकाने आपल्या नावावर केली आहे. मात्र, आता सर्वांची चिंता गुरबाजच्या फिटनेसबाबत आहे. पुढच्या महिन्यात ७ फेब्रुवारीपासून टी-२० वर्ल्ड कप २०२६ सुरू होत आहे. जर गुरबाज या दुखापतीमुळे बाहेर झाला, तर तो अफगाणिस्तानसाठी खूप मोठा धक्का असेल.