आळेफाटा : कुकडी डाव्या कालव्याच्या म्हस्केवाडी परिसरातील चारी क्रमांक 11 जवळ सुरू असलेल्या अस्तरीकरणाच्या कामाच्या दर्जाबाबत प्रश्न उपस्थित करण्यात आले आहेत. या कामाची गुणवत्ता आणि टिकाऊपणा याबाबत शंका व्यक्त करत संबंधित विभागाच्या वरिष्ठ अधिकार्‍यांनी तातडीने चौकशी करावी, तसेच कामात दोष आढळल्यास संबंधितांवर कठोर कारवाई करावी, अशी मागणी करण्यात आली आहे.

कालव्याच्या अस्तरीकरणामुळे पाण्याची गळती कमी होऊन शेतीसाठी उपलब्ध होणार्‍या पाण्याचे योग्य व्यवस्थापन होणे अपेक्षित आहे. मात्र, म्हस्केवाडी परिसरात सुरू असलेल्या कामाच्या दर्जाबाबतच प्रश्न उपस्थित होत असल्याने त्याच्या गुणवत्तेची तपासणी करण्याची गरज व्यक्त होत आहे. सरकारी निधीतून होणारे हे काम निकृष्ट ठरल्यास त्याचा फटका परिसरातील शेतकर्‍यांना बसण्याची शक्यता आहे. संबंधित विभागाच्या वरिष्ठ अधिकार्‍यांनी कामाची प्रत्यक्ष पाहणी करून वापरण्यात येणारे साहित्य, कामाची पद्धत आणि निर्धारित निकषांची पूर्तता होत आहे की नाही, याची तपासणी करावी. कामात अनियमितता किंवा हलगर्जीपणा आढळल्यास संबंधित ठेकेदारावर कठोर कारवाई करून त्याला काळ्या यादीत टाकावे.

तसेच कामाच्या देखरेखीत दोषी आढळणार्‍या अभियंत्यांवरही कारवाई करावी, अशी मागणी बलुतेदार संघटनेचे पारनेर तालुका अध्यक्ष बाळासाहेब शिरतार आणि पाडळी आळेगावचे माजी उपसरपंच बाळासाहेब गुजर यांनी केली आहे. कुकडी डावा कालवा हा परिसरातील शेतीसाठी महत्त्वाचा जलवाहिनी मार्ग आहे. त्यामुळे त्याचे अस्तरीकरण मजबूत आणि दर्जेदार होणे आवश्यक आहे. आज खर्च केलेला निधी उद्या त्याच कामाच्या दुरुस्तीसाठी पुन्हा खर्च करण्याची वेळ येऊ नये, यासाठी संबंधित विभागाने कामाच्या गुणवत्तेबाबत कठोर भूमिका घ्यावी, अशी अपेक्षा शेतकरी वर्गातून व्यक्त होत आहे.

दोषींवर कारवाई करा

अस्तरीकरणाच्या कामाची केवळ पूर्तता दाखवण्याऐवजी त्याची गुणवत्ता तपासावी. काम निकृष्ट असल्याचे आढळल्यास संबंधित ठेकेदारासह जबाबदार अभियंत्यांवरही कारवाई करावी, अशी मागणी बाळासाहेब शिरतार आणि पाडळी आळेगावचे माजी उपसरपंच बाळासाहेब गुजर यांनी केली आहे.