मोरगाव : अष्टविनायक प्रथम तीर्थक्षेत्र मोरगाव (ता .बारामती) येथे विजयादशमी सोहळ्यानिमित्ताने मयुरेश्वराचा शाही सीमोल्लंघन सोहळा मंगळवार, दि. २० रोजी रात्री साडे आठ वाजता निघाला होता. या सोहळ्या निमीत्ताने शिवकालीन तोफांची सलामी, रंगीत फटाक्यांच्या आतषबाजी, सनई चौघड्यांचा मंगलमई सुर , मोरया – मोरया नामाचा जयघोष व श्रींच्या स्वारीवर फुलांचा वर्षाव करीत हजारो भक्ता समवेत मार्गक्रमण करीत होता. ग्रामप्रदक्षिणा घालात हा सोहळा दुसऱ्या दिवशी तब्बल १५ तासांनी पुन्हा मयुरेश्वर मंदिरात आला.

मंगळवार, दि.२० रोजी विजया दशमीनिमित्ताने सालाबादप्रमाणे पहाटे शिवकालीन पाच तोफांचे पुजन करण्यात आले. दसऱ्या निमित्ताने मयुरेश्वर मंदिर शिखर, तटबंदीवर सुदंर आकर्षण रंगीत माळांची व फुुलाची रोषणाई करण्यात आली होती. दसऱ्याच्या निमित्ताने सीमोल्लंघन सोहळा कसा संपन्न होणार याविषयी सकाळी ९ वाजता मयुरेश्वर मंदिराच्या दगडी फरसावर सर्व ग्रामसस्थांची बैठक संपन्न झाली.

यानंतर मानकऱ्यांना डाळ, गुळ, तांदुळाचा शिधा देण्यात आला. मंदिर मार्गक्रमण व सर्वांना सूचना देण्यात आला प्रत्येकाची जबाबदारी समजून सांगण्यात आली. आज दसऱ्या निमित्ताने मयुरेश्वरास भरजडीत हिरे, माणिक, मोतीयुक्त सुवर्णालंकार चढविण्यात आले होते. यानंतर सायंकाळी सहा वाजता मयुरेश्वरसह सिद्धी बुद्धी मातेस पोशाख चढविल्यानंतर मोरगाव ग्रामस्थांसहीत भावीकांनी श्रींना आपट्याचे सोने वाहण्यासाठी रांगा लावल्या होत्या. रात्री साडेआठ वाजण्याच्या सुमारास श्रींचा पालखी सोहळा गावातील देवतांच्या भेटीसाठी व सीमोल्लंघनासाठी निघाला .

यावेळी पालखीचे खांदेकरी, आबदागिरी, दिवटी, छत्री, हिलाल, रुमाली आदींचे मानकरी होते. तसेच राज्यासह परराज्यातून आलेले हजारो भक्त उपस्थित होते. श्रींचा पालखी सोहळा सीमोल्लंघनाला निघाल्यानंतर मंदिरासमोरील बाजारपेठत भूईनळे, रंगीत फटाक्यांच्या आतषबाजी, तोफांच्या सलामी, मोरया मोरया जयघोष , फुलांचा वर्षाव करीत पालखी सोहळा सोमोल्लंघनासाठी निघाला होता. मंदिरासमोरील मुख्य पेठेतून हा सोहळा, ग्रामपंचायत समोरुन बाजार तळावर मार्गक्रमण करत होता. यावेळी पालखीसमोर भुईनळे उडविले जात होते.

बाजार तळावर ४० फुट उंच दशमुखी रावण पुर्णाकृती पुतळा तयार केला होता. रावण दहन व रंगीत सुशोभित फटाक्यांची आतषबाजी पाहण्यासाठी भाविकाांनी गर्दी केली होती. यावर्षी जय गणेश प्रतीष्ठान च्या वतीने महादेव मंदिर शेजारी महीलांना स्वतंत्र व्यवस्था केली होती. पालखी बाजार तळावर आल्यानंतर श्रींच्या विसावा कट्ट्यासमोर मोठ्या प्रमाणात फटाक्यांची आतषवाजी केली. यामुळे जणु सहस्त्र चंद्र भुतलावावर आल्याचा अनुभव उपस्थित भक्तांनी घेतला.

आतषबाजीनंतर रावण दहन करण्यात आले. दरवर्षी हिंगण (रॉकेटसारखा घरी बनविलेला फटाका) उडविले जातात. मात्र, गेल्या तीन वर्षापासून उत्सव कमिटीच्या वतीने सांगण्यात आलेल्या सुचनानुसार तरुणवर्गाने सहकार्य करुन हिंगण न उडवल्याने आलेला प्रत्येक भक्त या सोहळ्याचा मनसोक्त आनंद घेत होता.

रावण दहनानंतर मानकरी व हजारो भक्तांसमवेत पालखी सोहळा कऱ्हा नदी पार करुन नदीपलीकडे हरमळीचा खेळ (पालखी एकमेकांकडे ओढण्याचा खेळ) फिरंगाई मातेचा गोंधळ, नग्नभैरव, गंगा आरती, महादेव आरती झाली. यानंतर खंडोबा आरती व मुख्य चौकातुन सोनोबा मंदीरात आला. येथे वंशावळ वाचण्याची विशिष्ट अशी प्रथा असंख्य वर्षापासून सुरू आहे. पुढे तोफांची सलामी देत मार्गक्रमण करीत येथील मयुरेश्वर विद्यालय, धनगर वाडा, माळी आळीतून, ग्रामपंचायतसमोरील रस्त्यावरुन पुन्हा बाजार तळावर आला. येथे सोहळा आल्यानंतर देवाच्या पालखीवर पिंजरी पुन्हा बसविण्यात येते.

पालखीसमवेत असलेल्या मोरगाव व पंचक्रोशीतील हजारो भक्तांसमवेत हा सोहळा मुख्य पेठेतून मंदिरामध्ये आला. सोहळा मार्गक्रमण करीत असताना घरोघरी भुईनळे उडवण्यात येत होती. मंदिरासमोरील दगडी फरसावर फटाक्यांची आतषबाजी पाहण्यासाठी मोरगावकरांनी तुंबळ गर्दी केली होती. मयुरेश्वर मंदिरात पालखी दुसऱ्या दिवशी तब्बल १५ तासांपेक्षा अधिक वेळाने आला. मंदिरात पालखी आल्यानंतर पालखीवर फुलांचा वर्षाव करण्यात आला. मानकऱ्यांना अंगारा देण्यात आला . यानंतर श्रींची आरती झाल्यानंतर सोहळा समाप्त झाला.